Protestat për kostot e jetesës tronditin Francën, interesi i borxhit kalon 5%

Gaz lotsjellës dhe topa uji në Paris, kosha plehrash në flakë dhe dy dyqane bizhuterish të plaçkitura në Marseille: Franca përjetoi fundjavën e dytë radhazi në të cilën protestat, kryesisht paqësore, kundër pabarazisë dhe krizës së kostos së jetesës u kthyen në përplasje me policinë.

Sipas Ministrisë së Brendshme franceze, rreth 410 mijë njerëz morën pjesë të shtunën në protesta në disa qytete të mëdha të vendit, përfshirë Parisin.

Në kryeqytet, policia e trazirave përdori gaz lotsjellës dhe topa uji për të shpërndarë një grup prej rreth 500 të rinjsh me kapuç, të cilët gjuajtën me gurë ndaj efektivëve, sipas një zyrtari të sigurisë.

Skena edhe më të tensionuara u panë në Marseille, qyteti i dytë i Francës. Të rinjtë tërhoqën fletë të mëdha metalike për të bllokuar një rrugë, u vunë flakën koshave të plehrave dhe gjuajtën me gurë e shishe ndaj policisë së trazirave. Përplasjet vazhduan edhe pas perëndimit të diellit, ndërsa policia bëri të ditur se plaçkitës sulmuan dy dyqane bizhuterish.

Përplasje shpërthyen gjithashtu në Lyon, Bordeaux dhe Grenoble, ndërkohë që në Clermont-Ferrand, Lille, Nantes dhe Nice policia hodhi breshëri gazi lotsjellës ndaj protestuesve.

Autoritetet franceze i kishin shtuar ndjeshëm masat e sigurisë para protestave të së shtunës. Fundjavën e kaluar, protestues të dhunshëm i kishin vënë flakën bashkisë historike të Limoges, ndërsa plaçkitës shkatërruan supermarkete dhe butikë luksi në Lyon. Edhe pse përplasjet u përsëritën, dhuna këtë herë ishte më e ulët se një javë më parë, kur plaçkitës dhe vandalë u lëshuan nëpër rrugët e një sërë qytetesh franceze.

Lëvizja nisi muajin e kaluar nga një grup nxënësish të shkollave të mesme në periferi të Parisit, të cilët u ankuan për kushtet e këqija në shkolla, mes tyre mungesën e mësuesve dhe ambientet e papërshtatshme. Që atëherë, protestat janë zgjeruar dhe janë shndërruar në një lëvizje mbarëkombëtare kundër pabarazisë dhe shtrenjtimit të jetesës.

Trazirat po zhvillohen në një moment të vështirë për financat e vendit. Problemet ekonomike dhe politike të Francës kanë rritur ndjeshëm koston e huamarrjes së qeverisë: këtë javë, rendimenti i obligacionit shtetëror me afat 10-vjeçar kaloi kufirin e 5% për herë të parë që nga viti 2002, duke u stabilizuar rreth 5,03% të premten.

Disa investitorë kanë frikë se problemet e borxhit francez mund të përhapen edhe në pjesën tjetër të eurozonës.