SHSKUK jep mbi 4,2 milionë euro për barna kanceri, anemie e hemofilie

Shuma më e madhe shkon për anemi të rëndë: 1.707.744,60 euro për 12.366 copë agjentë stimulues të eritropoezës, barna që përdoren për të trajtuar aneminë e rëndë dhe për të stimuluar palcën e kockave. Ky është zëri kryesor i një kontrate prej mbi 4,2 milionë eurosh që Shërbimi Spitalor Klinik Universitar i Kosovës (SHSKUK) ka dhënë për furnizim me 12 lloje barnash.

Kontrata për këto barna iu dha kompanisë MEDITECH. Tenderi në tërësi ishte planifikuar me vlerë 5,5 milionë euro dhe ishte ndarë në 14 lote, secili me lloje të ndryshme medikamentesh. Sipas dokumentacionit të tenderit, të siguruar nga IndeksOnline, asnjë prej barnave nuk është kontraktuar me vlerë më të lartë se ajo e parashikuar.

Pjesa më e madhe e listës i përket onkologjisë. Për leukeminë, SHSKUK-ja siguroi 35.000 copë nilotinib me 455.700 euro, me kontratën që iu dha kompanisë DELTAPHARMA-KS SH.P.K. Për gemcitabinën u ndanë 335.172 euro për 9.858 copë, ndërsa tenderin e fitoi Liri-Med, e cila mori edhe furnizimin me pemetreksed, 840 copë në vlerë 121.800 euro, që do të përdoren për trajtimin e kancerit të mushkërive.

Trastuzumabi, medikament për trajtimin e kancerit, u sigurua në sasinë 1.633 copë për 187.795 euro nga grupi i operatorëve ekonomikë GENE MEDICALS SH.P.K. dhe EDNAFARMA. Për kancerin e mëlçisë u blenë 40.833 copë sorafenib me 109.024,11 euro, me fitues kompaninë Santefarm.

Imatinibi, i destinuar për trajtimin e llojeve të ndryshme të kancerit, u kontraktua me kriterin e çmimit më të ulët të përgjegjshëm: 37.800 copë për 60.102 euro. Për tumoret malinje të trurit, MEDI MAX SH.P.K. do të furnizojë 6.533 copë temozolamid në vlerë 39.132,67 euro. Në listë figuron edhe sunitinibi, me 4.666 copë për 27.529,40 euro, pa u bërë e ditur kompania furnizuese.

Jashtë onkologjisë, loti 2 mbuloi 2.934 copë faktor IX të koagulimit, në vlerë 469.440 euro, për trajtimin dhe parandalimin e gjakderdhjes te personat me hemofili B. Fituese e këtij loti u shpall kompania Agani L.T.D SH.P.K.

Loti 3 kushtoi rreth 705 mijë euro, saktësisht 704.904 euro, për 20.432 copë etanercept, me kontratë për Santefarm, e cila kështu fitoi dy nga furnizimet e këtij tenderi. Loti 5, për midazolamin që përdoret për sedacion, iu dha kompanisë MEDI MAX: 128.946 copë për 39.973,26 euro.

Krahas cisplatinës dhe kombinimit piperacilinë me tazobaktam, me këtë procedurë SHSKUK-ja ka siguruar një mori barnash të tjera për spitalet e saj.