Alarm në industrinë e qumështit: 16 qumështore ndalin prodhimin pas vendimeve qeveritare

Industria vendore e qumështit është para kolapsit, paralajmëron Gani Durmishi nga Shoqata e Industrisë së Qumështoreve. Sipas tij, 16 qumështore e kanë ndërprerë plotësisht prodhimin pas vendimeve të fundit të Ministrisë së Bujqësisë.

Durmishi tha në emisionin EURO n’T7 se më 21 tetor iu drejtua me një letër-kërkesë urgjente ministrit Armend Muja dhe kryeshefes së Agjencisë së Ushqimit dhe Veterinarisë, Venera Qerkini. Në letër shoqata kërkon hapa urgjentë dhe tërheqjen e vendimeve të mëhershme, të cilat, sipas Durmishit, po i çojnë drejt mbylljes 16 qumështore në të gjithë vendin.

Pesha e këtyre bizneseve në treg nuk është e vogël. "Këto 16 qumështore kanë punuar dhe prodhuar qumësht e produkte të tjera, të cilat kanë mbuluar mbi 40% të nevojave të tregut vendor. Qëllimi ynë ishte që, me investime vetanake dhe subvencione që kemi marrë më herët, ta zëvendësojmë importin me prodhim cilësor vendor", tha ai.

Në qendër të ankesës është ndalesa për produktet me vaj bimor, të cilën prodhuesit vendas e shohin si trajtim të pabarabartë ndaj importit. "Sot ne kemi ndalesa nga institucionet tona për të prodhuar dhe hedhur në treg produkte me vaj bimor, ndërsa tregu është mbushur me produkte të importuara me vaj bimor", deklaroi Durmishi.

Nuk dihet ende nëse Ministria e Bujqësisë apo Agjencia e Ushqimit dhe Veterinarisë i janë përgjigjur letrës së 21 tetorit.