Pas mbesës së Sveçlës, një tjetër familjare e pushtetit në diplomaci

Ambasada e Kosovës në Berlin ka një diplomate të re me lidhje familjare në majë të pushtetit: K. D., vajza e axhës së Luan Dalipit, ish-shefit të kabinetit të kryeministrit Albin Kurti, është caktuar të shërbejë atje për katër vjet.

Vendimi mban nënshkrimin e Glauk Konjufcës, zëvendëskryeministrit të parë dhe ministrit në detyrë të Punëve të Jashtme dhe Diasporës. Sipas dokumentit, të cilin e ka siguruar Gazeta Nacionale, ajo do të mbajë gradën funksionale Sekretare e Dytë, me mandat katërvjeçar.

Dalipi, pas largimit nga kabineti i kryeministrit, aktualisht drejton Agjencinë për Investime dhe Eksport.

Rasti nuk është i vetëm. Më herët, në shërbimin diplomatik të Kosovës është sistemuar edhe mbesa e ministrit të Punëve të Brendshme, Xhelal Sveçla, duke e bërë këtë emërim të dytin që prek familjarë të figurave të afërta me qeverinë.