Bajrami: Kurti do ta miratojë buxhetin pas afatit ligjor të 31 tetorit

Afati ligjor për dorëzimin e Projektligjit për Buxhetin në Kuvend skadoi më 31 tetor. Sipas deputetes së Lidhjes Demokratike të Kosovës (LDK), Hykmete Bajrami, atë ditë buxheti i vitit 2027 nuk ishte miratuar ende as në Qeveri.

Bajrami u mbështet te Ligji për Menaxhimin e Financave Publike dhe Përgjegjësitë, i cili, sipas saj, e obligon Qeverinë ta dërgojë projektbuxhetin në Kuvend jo më vonë se më 31 tetor. Ajo pretendon se kryeministri Albin Kurti ka paralajmëruar në Këshillin e Përgjithshëm të LVV-së, partisë së tij, se buxheti do të miratohet të hënën, më 2 nëntor, pra pas skadimit të afatit.

Në një reagim me shkrim, deputetja e opozitës e krahasoi situatën me vitin e kaluar: “Kryeministri Kurti paska paralajmëru në Këshillin e Përgjithshëm të partisë së tij se buxhetin do ta miratojë të hënën, më 2 nëntor. Vitin e kaluar, pikërisht më 31 tetor, Kurti mburrej se po e miratonte buxhetin brenda afatit ligjor. Sivjet, paska vendosë me mburrje me e shkelë edhe këtë afat. Por, meqë tashmë veç kemi rrëshqitur në parti-shtet, buxheti i Republikës fillimisht “kaloj” filtrin e Këshillit të Përgjithshëm të LVV-së, pastaj do të miratohet në Qeveri dhe pas çdo afati ligjor do t’i dërgohet Kuvendit”.

Sipas Bajramit, për Kurtin “partia s’pyet për ligj e afate ligjore, partia e përcakton rendin e gjërave”.

Për shifrën prej mbi 1 miliard eurosh të paralajmëruar për investime kapitale, Bajrami tha se do të shprehet pasi ta shohë projektbuxhetin. Megjithatë, ajo supozon se këtë herë janë paraparë edhe para për kompaninë ndërkombëtare që Dimali ka planifikuar ta angazhojë për të vlerësuar sasinë dhe cilësinë e punimeve në Autostradën e Gjilanit.

Në atë autostradë, sipas deputetes, janë shpenzuar rreth 80 milionë euro, ndërsa rruga ende nuk ka përfunduar. Bajrami akuzon qeverinë e LVV-së se prej gjashtë vjetësh nuk po arrin t’i përfundojë projektet rrugore.