Mbesa e ministrit Sveçla emërohet diplomate në Washington, pikëpyetje për procedurën

Mbesa e ministrit të Punëve të Brendshme, Xhelal Sveçla, do të shërbejë si diplomate në njërin prej misioneve më të rëndësishme të Kosovës jashtë vendit. Ministri i Punëve të Jashtme, Glauk Konjufca, nënshkroi më 15 maj 2026 vendimin me të cilin R. D. emërohet Sekretare e Dytë në Ambasadën e Republikës së Kosovës në Washington.

Dokumenti i nënshkruar nga Konjufca, i siguruar dhe i publikuar nga portali Nacionale, parasheh një mandat katërvjeçar. Detyra e re nis më 1 dhjetor 2026.

R. D. ishte punësuar në Ministrinë e Punëve të Jashtme dhe Diasporës (MPJD) në nëntor 2025. Kjo do të thotë se kalimi nga punësimi në ministri te një post diplomatik në Washington ndodhi brenda pak muajsh, gjë që ka ngritur pyetje mbi kriteret e përzgjedhjes dhe mënyrën e avancimit në shërbimin diplomatik. Nuk është bërë e ditur se si u zhvillua procedura, nëse u përmbushën kriteret ligjore dhe profesionale dhe mbi çfarë baze u përzgjodh ajo.

Nuk është hera e parë që një familjare e ministrit Sveçla përfundon në administratën publike. Më herët ishte raportuar se nëna e R. D.-së dhe motra e ministrit, M. H., ishte punësuar në Ministrinë e Bujqësisë, Pylltarisë dhe Zhvillimit Rural.

Atëherë, ministria e mohoi se ajo ishte rekrutuar nga stafi i saj. Megjithatë, u publikua një dokument që tregonte se M. H. ishte bërë pjesë e shërbimit civil në atë institucion, e emëruar në pozitën e "Zyrtares së Lartë të Pagesave Direkte" në Drejtorinë e Pagesave Direkte të Agjencisë për Zhvillimin e Bujqësisë, e cila funksionon në kuadër të Ministrisë së Bujqësisë.

Emërimi i ri në Washington e rikthen në qendër të vëmendjes çështjen e punësimit dhe avancimit të familjarëve të zyrtarëve të lartë në institucionet publike, si dhe transparencën e procedurave që çojnë në këto vendime.