Pas votës në Serbi, Lista Serbe zotohet të mbrojë pagat dhe ndihmat nga Beogradi

Reagimi i Listës Serbe pas zgjedhjeve në Serbi nuk ndalet te rezultati, por te paratë që vijnë nga Beogradi. Partia u zotua se do të angazhohet që mbështetja financiare e Serbisë për serbët në Kosovë, nga pagat deri te ndihmat sociale, të mos vihet në pikëpyetje pas fitores së Listës Studentore në zgjedhjet e mbajtura në Serbi.

Qëndrimi u bë publik përmes një komunikate për media të shpërndarë në Facebook, në të cilën Lista Serbe miratoi disa pika. Në lidhje me vetë votimin, partia shprehet shkurt: ajo "merr në dijeni" rezultatet preliminare të zgjedhjeve në Serbi.

Pjesa tjetër e deklaratës u kushtohet serbëve në Kosovë. Lista Serbe thotë se do të vazhdojë "të luftojë me vendosmëri, përgjegjësi dhe pa kompromis për mbijetesën, interesat dhe të drejtat kolektive dhe individuale" të tyre.

Pika më konkrete ka të bëjë me mbështetjen ekonomike që vjen nga Serbia. Sipas partisë, ajo do të angazhohet që "në asnjë mënyrë të mos vihen në pikëpyetje vendet ekzistuese të punës, të ardhurat e rregullta të të punësuarve, vazhdimi i investimeve dhe punësimeve të reja, si dhe ndihmat sociale dhe të gjitha format e tjera të mbështetjes financiare" që burojnë nga Serbia.

Komunikata përfundon me një thirrje drejtuar aktorëve politikë në Kosovë dhe mediave, të cilave Lista Serbe u kërkon "të ndalojnë menjëherë përhapjen e dezinformatave, pretendimeve të pabazuara dhe spekulimeve".