Tulltorja e Prishtinës jepet për 50 vjet: Rama premton një milion euro në vit

Prona komunale e njohur si "Tulltorja" në Prishtinë do të jepet në shfrytëzim për 50 vjet, ndërsa kryeqyteti, sipas kryetarit Përparim Rama, do të arkëtojë rreth një milion euro në vit nga marrëveshja. Kërkesa për miratimin e dhënies në shfrytëzim u parashtrua nga Rama në një seancë të Kuvendit Komunal të Prishtinës, ditën e premte, ku ai u kërkoi votat asamblistëve.

Në vendin e njohur si Tulltore parashihet ndërtimi i një qendre për zhvillimin e artit, kulturës dhe teknologjisë. Rama theksoi se projekti është prezantuar në konferencën e investitorëve amerikanë dhe mbështetet nga Ambasada Amerikane.

Pika që kryetari i Prishtinës e përsëriti më shumë ishte statusi i pronës. Toka, sipas tij, mbetet pronë e kryeqytetit dhe nuk falet, ndërsa pas përfundimit të periudhës 50-vjeçare të shfrytëzimit, si toka ashtu edhe objekti i ndërtuar do t'i mbeten Prishtinës. "Kjo tokë nuk falet. Toka mbetet pronë e kryeqytetit; jepet në shfrytëzim për t'u zhvilluar dhe për këtë shfrytëzim, kryeqyteti përfiton një milion euro në vit. 50 vjet, mbi 50 milionë", deklaroi ai.

Rama e paraqiti votimin si një zgjedhje mes dy alternativave për një hapësirë që aktualisht, sipas tij, është e pazhvilluar. "Këtu sot nuk vendosim vetëm për një parcelë, por vendosim a do ta lëmë një pronë publike të pazhvilluar, të pasigurt, vend i problemeve që pastaj varet prej 100 eurove që i shkepni ju, apo e kthejmë në zhvillim, të hyra, vende pune dhe aset për kryeqytetin tash dhe për gjeneratat e ardhshme", u shpreh kryetari i Prishtinës.

Në një prononcim tjetër, Rama shtoi: "Po e marrim një pronë që sot nuk i sjell kryeqytetit veç probleme, po e vendosim në funksion të zhvillimit dhe po krijojmë një aset që i sjell kryeqytetit të hyra, vende pune dhe zhvillim".

Përveç përmbajtjes kulturore dhe teknologjike, projekti parashikon edhe një parking nëntokësor, me synimin e lehtësimit të qasjes drejt qendrës së qytetit. Rama u ndal edhe në aspektin infrastrukturor, duke thënë se plani është i rëndësishëm për lidhjen e disa lagjeve me qendrën e Prishtinës.

Ky nuk është hapi i parë administrativ për zonën. Disa javë më parë, Komuna e Prishtinës miratoi lejen ndërtimore për një nga projektet më të mëdha publike të planifikuara në hapësirën e Tulltores, ndërsa dokumentet tregojnë se synohet ndërtimi dhe rindërtimi i një kompleksi të gjerë administrativ, afarist, hotelier, kulturor dhe teknologjik, përfshirë hotel, restorante dhe hapësira teknologjike.