Trup i një 34-vjeçari gjendet në një lum në Han të Elezit, nis hetimi

Një burrë 34-vjeçar, shtetas i Kosovës, u gjet pa shenja jete në një lum në vendin e quajtur "Skollovc", në fshatin Dërmjak të Komunës së Hanit të Elezit. Ngjarja ndodhi më 12 gusht 2026.

Sipas zëdhënësit të Policisë për rajonin e Ferizajt, Kanun Veseli, njësitë e Hetimeve Rajonale dhe të Forenzikës dolën në vendin e ngjarjes, ndërsa ekipet emergjente nxorën trupin nga uji.

"Më 12.08.2026, në fshatin Dërmjak, Komuna e Hanit të Elezit, në vendin e quajtur 'Skollovc', është gjetur një person pa shenja jete në një lum. Njësitë e Hetimeve Rajonale dhe Forenzikës kanë dalë në vendin e ngjarjes, ndërsa ekipet emergjente kanë nxjerrë trupin nga uji. Mjeku kujdestar i QKMF-së në Han të Elezit ka konstatuar vdekjen e viktimës, mashkull, 34-vjeçar, shtetas i Kosovës", tha Veseli.

Mjeku kujdestar i Qendrës Kryesore të Mjekësisë Familjare në Han të Elezit konstatoi vdekjen. Sipas Veselit, nga ekzaminimet fillestare nuk u vërejtën shenja të dukshme lëndimesh.

Me urdhër të prokurorit, trupi u dërgua në Institutin e Mjekësisë Ligjore në Prishtinë për autopsi dhe përcaktimin e shkakut të vdekjes. Rasti është duke u hetuar nga njësitë kompetente policore.