Trump heq taksat për 300 mijë tonë mish viçi, me sy nga zgjedhjet e nëntorit

Çmimi i mishit të viçit është kthyer në një dhimbje koke për konsumatorët amerikanë — dhe presidenti Donald Trump vendosi t'i përgjigjet duke prekur armën e tij ekonomike më të njohur: taksat doganore, këtë herë duke i hequr.

Të premten, më 21 gusht, Trump zyrtarizoi pezullimin për 90 ditët e ardhshme të tarifave mbi importin e rreth 300 mijë tonëve mish viçi në Shtetet e Bashkuara. Qëllimi i deklaruar është ulja e çmimit të këtij produkti, në një kohë kur mbeten më pak se tre muaj deri te zgjedhjet legjislative të mesit të mandatit.

Në vendin e hamburgerëve, mishi i viçit është kthyer në një nga ushqimet që po shqetësojnë blerësit. Sipas të dhënave zyrtare mbi inflacionin në maj, një copë biftek kushtonte 15 për qind më shtrenjtë se një vit më parë.

Çmimet pasqyrojnë tensionet mbi ofertën: fondi blegtoral i gjedhëve në Shtetet e Bashkuara është në nivelin më të ulët që nga vitet 1950. Blegtorët i lidhin këto vështirësi me arsye ekonomike dhe klimatike, si thatësirat e njëpasnjëshme që djegin kullotat.

"Ndërsa përpiqemi ta rindërtojmë këtë tufë dhe të mbështesim blegtorët tanë, gjatë nëntëdhjetë ditëve të ardhshme Shtetet e Bashkuara do të lejojnë importimin e deri në 300 mijë tonë produkte të destinuara për mishin e grirë, pa taksa doganore jashtë kuotës", saktësoi presidenti amerikan në platformën e tij Truth Social.

Trump pohoi gjithashtu se mishi i importuar do të shitej "me një çmim 25 për qind më të ulët se çmimet aktuale në treg", pa përcaktuar megjithatë vendet nga do të vinte ai.

Fuqia blerëse është një nga shqetësimet kryesore të amerikanëve në afrimin e zgjedhjeve të mesit të mandatit. Në fund të korrikut, ministria amerikane e bujqësisë kishte njoftuar rifillimin e afërt të importeve të gjedhëve nga Meksika, më shumë se një vit pas pezullimit të shkaktuar nga një mosmarrëveshje mbi luftën ndaj një paraziti. Sipas vlerësimeve të të dy qeverive, në vitin 2024 Meksika eksportoi pak më shumë se 1 milion krerë bagëti te fqinji i saj.

Përballë efektit inflacionist të mbitarifave, Uashingtoni kishte anuluar edhe ato që godisnin një sërë produktesh bujqësore nga Brazili, si mishi i viçit, por edhe kafeja dhe domatet.