Tre të vrarë në autobusin e Gllogjanit, Gjykata e Pejës shpall aktgjykimin të hënën

Katër vjet pas të shtënave që shkaktuan tre viktima brenda një autobusi në Gllogjan, rasti hyn në fazën e vendimit. Gjykata Themelore në Pejë do ta shpallë aktgjykimin ndaj Halil, Kreshnik dhe Kastriot Mehmetajt të hënën, më 24 gusht, në orën 14:30.

Të tre akuzohen për ngjarjen e 26 nëntorit 2021, kur u qëllua me armë zjarri në drejtim të një autobusi që po qarkullonte në Gllogjan. Nga të shtënat mbetën të vrarë shoferi i autobusit, Gani Gjokaj, si dhe dy nxënës 17-vjeçarë, të identifikuar me inicialet L.H. dhe G.M. Një person tjetër, F.T., u plagos rëndë.

Sipas aktakuzës së Prokurorisë, objektivi i sulmit ishte pikërisht shoferi, tashmë i ndjeri Gani Gjokaj. Prokuroria pretendon se motivi i krimit ka qenë bindja e familjes Mehmetaj se ai ishte përgjegjës për vetëvrasjen e vajzës së tyre, Heroina Mehmetaj.

Skenari i përshkruar në aktakuzë është i detajuar: Kastriot Mehmetaj, i armatosur, kishte dalë në rrugë para autobusit duke u shtirur si i dehur, me qëllim që ta detyronte shoferin të ngadalësonte ose të ndalonte. Pasi mjeti kishte ngadalësuar, ai, sipas Prokurorisë, kishte shtënë në drejtim të shoferit. Pas sulmit, gjithnjë sipas aktakuzës, ai ishte larguar drejt fshatit Shaptej, ku e priste me veturë Kreshnik Mehmetaj.

Ndaj Halil Mehmetajt, aktakuza ngre një akuzë të veçantë: se në periudhën nga 14 qershori 2020 deri më 26 nëntor 2021 kishte nxitur dy djemtë e tij, Kastriotin dhe Kreshnikun, për vrasjen e Gani Gjokajt, duke e fajësuar vazhdimisht atë për vetëvrasjen e së bijës, Heroina Mehmetaj.

Të tre të akuzuarit mbeten të pafajshëm derisa gjykata të vendosë ndryshe me aktgjykim të formës së prerë.