Thirrja për pushkatim të Haradinajt në Kuvend, gjykata zgjat paraburgimin edhe një muaj

Fjalët u thanë brenda sallës plenare të Kuvendit të Kosovës, në një ditë kur dyert ishin hapur për vizitorët nga diaspora. Një muaj e gjysmë më vonë, personi që i shqiptoi ato mbetet pas hekurave: Gjykata e Prishtinës i ka vazhduar edhe për një muaj masën e paraburgimit Skender Llugiqit, i dyshuar se bëri thirrje për pushkatimin e ish-kryetarit të Aleancës, Ramush Haradinaj.

Vazhdimin e masës e konfirmoi zëdhënësja e Gjykatës së Prishtinës, Mirlinda Gashi. "Ju njoftojmë se pas kërkesës së Prokurorisë Speciale të Republikës së Kosovës për vazhdimin e masës së paraburgimit në çështjen penale ndaj të pandehurit S.LL., për shkak të dyshimit të bazuar se ka kryer veprat penale Kanosja dhe Nxitja e përçarjes dhe mosdurimit, gjyqtari i procedurës paraprake pas shqyrtimit të kërkesës, përmes Aktvendimit ka aprovuar kërkesën e PSRK-së, ashtu që të njëjtit i është vazhduar masa e paraburgimit në kohëzgjatje prej 1 (një) muaj, deri më datë 12.10.2026", thuhet në përgjigjen e saj.

Prokuroria Speciale e Republikës së Kosovës e dyshon Llugiqin për dy vepra penale: kanosje dhe nxitje e përçarjes dhe mosdurimit. Sipas dyshimeve, ai e kërcënoi Haradinajn më 12 gusht 2026, gjatë vizitës së tij në Kuvend, në ditën e tretë të vizitës së mërgimtarëve.

Në disa pamje të publikuara në media, i dyshuari dëgjohet duke thënë se Ramush Haradinaj "duhet të dënohet dhe pushkatohet". Në po ato pamje nga salla plenare e hapur për vizitorët nga diaspora, ai dëgjohet duke thënë: "Nëse duhet me u dënu Millan Radoiçiqi 20 vjet, Ramush Haradinaj duhet me u dënu 40 vjet, 50, 100 vjet, duhet me u pushkatu".

Llugiqi u arrestua po atë 12 gusht 2026. Tre ditë më vonë, më 15 gusht, Gjykata e Prishtinës i caktoi një muaj paraburgim, masë që tani është zgjatur për një muaj tjetër.

Rasti pati jehonë edhe politike. Lideri i Aleancës, Ardian Gjini, reagoi për deklaratat kundër bashkëpartiakut të tij, duke vlerësuar se thirrjet vëllavrasëse në shtëpinë e ligjit nuk janë të rastësishme. "Ato janë produkti i saktë i një platforme mbi dhjetëvjeçare propaganduese", deklaroi Gjini.

Ndaj Llugiqit deri më tani ekziston vetëm dyshimi i bazuar i prokurorisë; fajësia mund të vërtetohet vetëm me vendim të formës së prerë të gjykatës.