Tenderi i karburanteve në Pejë e Gjakovë: BP mohon dokumentin e paraqitur nga IP-KOS

Një letër garancie që mban logon dhe emrin e kompanisë së naftës BP përfundoi në dosjen e një tenderi publik për furnizim me karburante në Kosovë. Por vetë kompania, e pyetur për vërtetësinë e dokumentit, është përgjigjur se nuk e njeh atë.

Rasti lidhet me tenderin për furnizim me karburante për rajonet e Pejës dhe të Gjakovës, ku si ofertuese figuron kompania “IP-KOS”, pronë e biznesmenit Shaip Mikullovci, i përshkruar si i afërt me Qeverinë e kryeministrit Albin Kurti. Në ofertë është paraqitur një dokument me titullin “Letter of Confirmation and Supply Guarantee”, që jepet sikur të ishte lëshuar nga “BP Oil International Limited”.

Dokumentacioni i tenderit kërkonte pikërisht një garanci të tillë: Autoriteti Kontraktues u kishte kërkuar operatorëve ekonomikë autorizim ose konfirmim drejtpërdrejt nga rafineria apo prodhuesi. Dokumenti i paraqitur mban datën 29 maj 2026 dhe si nënshkrues në emër të BP-së figuron Brian M. Puffer.

Përgjigjja e kompanisë ka ardhur më 6 gusht 2026, nga David R. Smith, këshilltar ligjor në “BP International Limited”. “Mund të konfirmojmë se nuk e njohim letrën të cilës i referoheni në korrespondencën tuaj dhe po ndërmarrim hapat e duhur si përgjigje ndaj kësaj çështjeje”, thuhet në përgjigjen e departamentit ligjor. Kjo përgjigje u dërgua edhe në kopje te Brian Puffer, personi emri i të cilit figuron si nënshkrues i dokumentit të diskutueshëm.

Në komunikimin me departamentin ligjor të BP-së, të siguruar nga portali Front Online, janë ngritur dyshime se dokumenti mund të përbënte përdorim të paautorizuar të identitetit korporativ dhe të nënshkrimit të një ish-zyrtari të kompanisë. BP-së i ishte kërkuar konkretisht të konfirmonte nëse dokumenti ishte autentik dhe nëse ishte lëshuar apo autorizuar prej saj.

Në kërkesën për rishqyrtim është pretenduar gjithashtu se Puffer ishte larguar nga BP që në vitin 2024 dhe se, në kohën kur dokumenti mban datën maj 2026, ai nuk ushtronte më funksion në kompani. Sipas materialeve të njëjta, në dokument mungojnë elemente që do të vërtetonin kompetencën e nënshkruesit për të lëshuar garanci në emër të BP-së: pozita aktuale, autorizimi për përfaqësim dhe të dhënat identifikuese.

Përgjigjja e kompanisë ngre pikëpyetje edhe mbi mënyrën se si dokumenti ka përfunduar në dosjen tenderuese dhe është pranuar nga Agjencia Qendrore e Prokurimit (AQP) gjatë vlerësimit të ofertave. Deri tani nuk ka një konfirmim zyrtar nga institucionet e Kosovës për nisjen e ndonjë hetimi mbi origjinën e dokumentit, mënyrën e nënshkrimit dhe personat që e kanë paraqitur në procedurën e prokurimit.