Të shtëna nga Mercedesi në orët e para të mëngjesit, i moshuari ndalohet nga patrulla në Drenas

Rreth orës 02:20 të datës 23 gusht, një patrullë e Policisë që po operonte në Çikatovë të Re të Drenasit vërejti një veturë të tipit Mercedes duke lëvizur drejt saj. Ndërsa automjeti po afrohej, shoferi dyshohet se ka shtënë me armë gjatë lëvizjes.

Policët reaguan menjëherë dhe e ndalën automjetin në vend. Në vendngjarje u thirrën edhe njësitë relevante për ekzaminimin e lokacionit.

Gjatë veprimeve policore u gjet dhe u sekuestrua një revole me gaz, si dhe një sasi e konsiderueshme municioni. Në total janë konfiskuar 88 fishekë të kalibrit 9 mm dhe tetë gëzhoja, të marra si prova materiale.

Për rastin është njoftuar Prokurori kujdestar, i cili ka urdhëruar inicimin e procedurës për dy vepra penale: "Mbajtje në pronësi, kontroll ose posedim të paautorizuar të armëve" dhe "Përdorim të armës apo mjetit të rrezikshëm".

Pas përfundimit të procedurave fillestare, i dyshuari, një 55-vjeçar nga Çikatova e Re, u dërgua në mbajtje për 48 orë në Qendrën e Ndalimit. Hetimet vazhdojnë për të sqaruar rrethanat dhe motivin e të shtënave.

I dyshuari prezumohet i pafajshëm derisa fajësia të mos provohet me vendim të formës së prerë të gjykatës.