Kërvasari, çifti u gjet i qëlluar në dhomën e gjumit: gruaja shtatzënë humbi jetën

Në një dhomë gjumi në fshatin Kërvasari të Malishevës, policia gjeti të dielën në mbrëmje një burrë dhe gruan e tij të plagosur me armë zjarri. Pak orë më vonë, gruaja, e cila sipas të dhënave të deritanishme ishte shtatzënë, ndërroi jetë nga plagët e marra.

Prokurori i shtetit doli në vendin e ngjarjes dhe, me vendimin e tij, rasti është iniciuar si "Vrasje e rëndë". Hetimet po vazhdojnë për të zbardhur plotësisht rrethanat, përfshirë motivin dhe mënyrën se si ka ndodhur incidenti.

Kronologjinë e ngjarjes e ka konfirmuar zëdhënësja e Policisë për rajonin e Gjakovës, Vlera Krasniqi. "Me datë 23.08.2026 rreth orës 23:20, jemi njoftuar për një rast të plagosjes me armë zjarri në fshatin Kërvasari-Malishevë. Njësitë policore kanë dalë menjëherë në vendin e ngjarjes, ku në një dhomë gjumi janë gjetur dy persona, një çift bashkëshortor, të plagosur nga arma e zjarrit. Të plagosurve u është ofruar ndihma e parë mjekësore dhe më pas janë dërguar për trajtim në QKUK", tha ajo.

Gjatë ekzaminimit të vendit të ngjarjes, policia ka gjetur dhe sekuestruar një armë zjarri, e cila dyshohet se është përdorur në këtë rast.

Rreth orës 01:10, njoftimi nga Qendra Klinike Universitare e Kosovës konfirmoi vdekjen e gruas. "Nga QKUK jemi njoftuar se viktima femër, e moshës madhore, ka ndërruar jetë", tha Krasniqi.

Bashkëshorti i saj mbetet nën trajtim mjekësor në QKUK.