Të maskuar dhe me pistoletë, i grabitën çantën me para një gruaje në Rahovec

Një grabitje me armë në Rahovec ka përfunduar me një grua të sulmuar fizikisht dhe pa çantën e saj të dorës. Sipas raportit të Policisë së Kosovës, ngjarja ndodhi më 11 shtator, rreth orës 23:25.

Dy persona të panjohur, të cilët dyshohet se ishin të maskuar dhe të armatosur me pistoletë, e sulmuan viktimën dhe, nën kërcënimin e armës, i morën çantën e dorës në të cilën kishte para të gatshme. Pas grabitjes, ata u larguan nga vendi i ngjarjes.

Gruaja pranoi trajtim mjekësor në vendngjarje. Policia e Kosovës ka bërë të ditur se rasti është nën hetime.

Në raportin policor ngjarja përshkruhet kështu: "Rahovec 11.09.2026 -23:25. Viktima femër kosovare raporton se dy persona të dyshuar të panjohur me maska dhe të armatosur me pistoletë kanë sulmuar fizikisht dhe nën kërcënimin e armës i kanë grabitur çantën e dorës në të cilën kishte para të gatshme dhe janë larguar nga vendi i ngjarjes. Viktima në vendngjarje ka pranuar trajtim mjekësor. Rasti nën hetime".

Nuk është bërë e ditur nëse ka persona të arrestuar për këtë rast.