Skenderaj: 16-vjeçari përfundon në spital, i dyshuari 18-vjeçar ndalohet 48 orë

Ora 07:30, fshati Burojë i Skenderajt. Policia merr informatën për një rrahje dhe niset drejt vendngjarjes. Aty patrulla gjen një 16-vjeçar bashkë me prindin e tij, me lëndime në kokë.

Prindi i të miturit u ka deklaruar policëve se djali i tij ishte sulmuar dhe kishte pësuar lëndime në kokë pasi dyshohet se ishte goditur me një çelës mekanik. Për shkak të gjendjes së tij, në vendngjarje ka intervenuar autoambulanca. I mituri, i identifikuar me inicialet M.M., është dërguar fillimisht për trajtim në QKMF në Skenderaj dhe më pas është transferuar në Spitalin Rajonal në Mitrovicë për trajtim të mëtejmë mjekësor.

I dyshuari, një 18-vjeçar, është shoqëruar në stacion policor dhe është intervistuar në praninë e avokatit mbrojtës. Pas trajtimit mjekësor, në stacion është paraqitur edhe i mituri, i cili është intervistuar në praninë e prindit.

Hetimet fillestare kanë nxjerrë edhe pistën se çfarë mund t'i ketë paraprirë sulmit: dy të rinjtë kishin pasur një konflikt verbal edhe një ditë më parë, por atë përplasje nuk e kishin raportuar në Polici.

Njësia e Hetimeve ka njoftuar prokurorin kujdestar, i cili ka urdhëruar inicimin e rastit për veprën penale "Lëndim i lehtë trupor". Ndaj të dyshuarit është marrë vendim për ndalim 48-orësh.

I dyshuari prezumohet i pafajshëm derisa fajësia të mos provohet me vendim të formës së prerë nga gjykata.