Shtatë vota të bllokuara: Aleanca kërkon takim publik me Kurtin për presidentin

Zgjedhja e presidentit të ardhshëm të Kosovës ka mbetur peng i një aritmetike që nuk mbyllet. Kryetari i Lëvizjes Vetëvendosje, Albin Kurti, dhe kryetari i LDK-së, Lumir Abdixhiku, u pajtuan në parim që Bekim Sejdiu të jetë kandidati për president të Republikës, por për ta bërë këtë emër realitet në Kuvend, Kurtit i duhen edhe vota të tjera.

Numrat u lëkundën brenda vetë LDK-së. Ditë më parë, Abdixhiku bëri të ditur se deputetët Avdullah Hoti, Hykmete Bajrami, Kujtim Shala, Armend Zemaj, Arben Gashi dhe Janina Ymeri kanë vendosur të mos e respektojnë vendimin e Kryesisë së partisë për mbështetjen e Sejdiut për president.

Në këtë situatë, Aleanca thotë se ka shtatë vota në dispozicion. Çmimi i tyre është i qartë: zbatimi i gjashtë pikave strategjike të këtij subjekti politik dhe negociata publike me kryetarin e VV-së. Kurti refuzoi të merret me kushtet e Aleancës.

Deputeti i Aleancës, Burim Ramadani, e lexon këtë refuzim si zgjedhje politike të vetëdijshme. "Refuzimi i kësaj oferte që ndodhi në fillim të shtatorit, pas dy muajsh, tregon që Kurti nuk i do 7 votat, rrjedhimisht don që t’i ndëshkojë qytetarët, edhe të shkojë në zgjedhje edhe të mos ketë kuorumin, sepse pranimi i këtyre 6 pikave do të bënte që Aleanca të rrinte në Kuvend", tha ai.

Ramadani këmbënguli se partia e tij nuk e ka refuzuar asnjëherë takimin me kreun e VV-së, por e ka kërkuar të hapur. "Ne s’jemi organizatë lobuese, jemi parti politike që kemi qëndrime politike dhe ato publike. Aleanca nuk e ka refuzu takimin, përkundrazi e ka kërku publik dhe para kamerave. Zoti Gjini s’ka asgjë për të fshehë prej popullit, pse dikush tjetër ka dashtë me mbajtë fshehtë", deklaroi ai.

Refuzimin e vlerëson si të padobishëm edhe analisti politik Fitim Mulolli. "Aq më tepër kjo deklaratë është më e rëndë sepse nuk merret fare parasysh, sikur të kishte lënë hapësirë për negocim apo për diskutim do të ishte më e matur dhe më konsensuale. Kur e dimë refuzimin nga gjashtë deputetët e LDK-së, nevoja për votat e Aleancës është më e madhe për të shpëtuar vendin nga një palë zgjedhje, duhej të ishte më konstruktiv", tha Mulolli.

Për momentin, kandidatura e Sejdiut mbetet e mbështetur nga një marrëveshje mes dy kryetarëve partiakë që nuk e ka mbuluar dot boshllëkun e votave në Kuvend.