Shtatë raste spiunazhi për Serbinë: dy oficerë të lartë të policisë kosovare të dënuar

Dy oficerë të lartë të Policisë së Kosovës janë dënuar me vendim të formës së prerë për spiunazh në favor të shërbimit serb të inteligjencës, BIA. Kjo është pjesa më e rëndë e një dosjeje që, sipas Prokurorisë Speciale të Kosovës, numëron deri më tani shtatë raste spiunazhi të lidhura me rekrutime nga strukturat e agjencisë serbe.

Detajet i ka bërë publike prokurori i Prokurorisë Speciale, Bekim Kodraliu, në një intervistë ekskluzive për RTK-në. Sipas tij, gjatë dy viteve të fundit prokuroria ka ndërmarrë veprime hetimore për këtë dukuri në bashkëpunim me Agjencinë Kosovare për Inteligjencë dhe Policinë e Kosovës.

"Më konkretisht, deri më tani kemi shtatë raste të spiunazhit me disa persona të cilët dyshohet se kanë qenë pjesë e rekrutimit të strukturave nga Agjencia e Inteligjencës serbe (BIA)", tha Kodraliu.

Nga këto raste kanë dalë deri tani katër aktgjykime dënuese për veprën penale të spiunazhit, dy prej të cilave të formës së prerë. "Kemi dy aktgjykime dënuese të cilat veç janë të formës së prerë, respektivisht të të dënuarit Aleksandër Vlajiq, si dhe të të dënuarit tjetër Bojan Jevtiq, të cilët që të dy kanë pranuar fajësinë për veprën penale për të cilën ne kemi ofruar edhe prova konkrete", u shpreh prokurori.

Kodraliu e cilësoi rastin të ndjeshëm për shkak të pozitave që kishin të dënuarit. Të dy, tha ai, ishin zyrtarë të lartë brenda Policisë së Kosovës. "Njëri ka qenë toger me gradë në Policinë e Kosovës, më konkretisht në pikën kufitare në Kamenicë, dhe tjetri ka qenë zyrtar i inteligjencës së policisë në pjesën e Veriut të Mitrovicës", deklaroi ai.

Aleksandër Vlajiq, sipas prokurorit, është dënuar edhe për sulmin terrorist ndaj zyrave të KKZ-së në Mitrovicë në dhjetor të vitit 2022. Pikërisht ai rast e çeli fillin e spiunazhit: nga ekzaminimi i telefonave të tij dolën provat që çuan te ndjekja e re. "Nga ekzaminimi i telefonave të të dënuarit Aleksandër Vlajiq kemi vërejtur dëshmi të mjaftueshme që të iniciojmë edhe rastin për spiunazh, e që nga sigurimi i provave të tjera kemi vërtetuar edhe para gjykatës që i njëjti ka qenë edhe i rekrutuar te shërbimi inteligjent serb, më konkretisht te zyrtari, respektivisht personi përgjegjës i BIA-s në rajonin e Novi Pazarit", tha Kodraliu.

Nga i njëjti hetim, sipas tij, ka nisur edhe një procedim penal ndaj një zyrtareje nga Mitrovica e Veriut, e cila ka qenë pjesë e misionit të OSBE-së në Kosovë. Ajo është dënuar në shkallën e parë, ndërsa çështja po trajtohet në Apel. "Për këtë arsye duhet të jem pak i rezervuar në trajtimin e kësaj zyrtareje, respektivisht e cila është duke u proceduar në gjykatë", theksoi prokurori.

Kodraliu foli edhe për rastin e Fatmir Shehollit, të cilin e lidhi me një zyrtar të lartë të BIA-s për kundërterrorizëm. "Fatmir Sheholli ka ofruar ndihmë për shërbimin inteligjent serb, konkretisht për zyrtarin e lartë të BIA-s për kundërterrorizëm, Bojan Dimiq, në implementimin e një misioni me qëllim të dëmtimit të disa figurave politike në Kosovë. E, çka është më e rëndësishmja, dëmtimi është synuar të shkaktohet para zgjedhjeve që janë mbajtur në Kosovë", deklaroi ai.