Shiroka Pula pret gjeneralin Grynkewich: prania e KFOR-it mbetet e rëndësishme për Kosovën

Siguria në Kosovë dhe në rajon ishte tema kryesore e takimit mes Presidentes së Republikës së Kosovës, Justina Shiroka Pula, dhe Komandantit Suprem të Forcave Aleate të NATO-s në Evropë (SACEUR), gjeneralit Alexus G. Grynkewich.

Bisedimet u përqendruan edhe te roli i NATO-s në ruajtjen e paqes dhe stabilitetit, si dhe te hapat për thellimin e mëtejshëm të bashkëpunimit.

Shiroka Pula shprehu mirënjohjen e Kosovës për kontributin e NATO-s dhe të KFOR-it në garantimin e sigurisë dhe stabilitetit në vend. Sipas saj, prania e KFOR-it vazhdon të jetë e rëndësishme për sigurinë e të gjithë qytetarëve dhe për ruajtjen e stabilitetit në Kosovë.

Presidentja ritheksoi gatishmërinë e Kosovës për të forcuar partneritetin me NATO-n dhe për të avancuar bashkëpunimin me aleatët, duke nënvizuar se anëtarësimi në Aleancë mbetet një ndër objektivat strategjikë të Republikës.

Ajo theksoi gjithashtu se Kosova mbetet e përkushtuar ndaj paqes, stabilitetit rajonal dhe bashkëpunimit të ngushtë me Shtetet e Bashkuara të Amerikës, NATO-n dhe partnerët ndërkombëtarë.