Kurti para komandantit suprem të NATO-s: plani i FSK-së do të përmbushet para vitit 2028

Kosova është përpara afateve në planin dhjetëvjeçar të zhvillimit të Forcës së Sigurisë së Kosovës (FSK) dhe synon ta përmbushë atë para vitit 2028. Këtë mesazh kryeministri Albin Kurti ia përcolli komandantit suprem të Forcave Aleate të NATO-s në Evropë, gjeneral Alexus Grynkewich, të cilin e priti në takim.

Grynkewich, i cili drejton njëkohësisht edhe Komandën Evropiane të Shteteve të Bashkuara, erdhi i shoqëruar nga komandanti i KFOR-it, gjeneralmajor Roberto Vergori, dhe nga e ngarkuara me punë në Ambasadën e Shteteve të Bashkuara në Kosovë, Anu Prattipati.

Para mysafirëve, Kurti u mbështet te shifrat. Sipas tij, prej katër vitesh me radhë Kosova ndan për mbrojtje më shumë se 2 për qind të Bruto Produktit Vendor. Ai tregoi se javën e kaluar u betuan 515 ushtarë të rinj, ndërsa këtë javë 209 rekrutë nisën stërvitjen bazë. Kryeministri shtoi se vendi po vazhdon me trajnime dhe blerje, me synim rritjen e profesionalizmit ushtarak dhe forcimin e kapaciteteve mbrojtëse të FSK-së.

Në pjesën tjetër të takimit, Kurti shprehu mirënjohjen e Kosovës për rolin e NATO-s në çlirimin e vendit dhe falënderoi KFOR-in për kontributin në ruajtjen e paqes së qëndrueshme dhe të stabilitetit afatgjatë në Kosovë dhe në rajon.