Shiroka Pula pret diplomaten amerikane: thirrje për partneritet më të thellë me SHBA-në

Presidentja e Republikës së Kosovës, Justina Shiroka Pula, priti në takim Anu Prattipatin, të ngarkuarën me punë në Ambasadën e Shteteve të Bashkuara të Amerikës në Prishtinë, e cila erdhi për ta uruar për marrjen e detyrës.

Sipas komunikatës së Presidencës, Shiroka Pula e falënderoi diplomaten amerikane për urimin dhe riafirmoi përkushtimin e saj për thellimin e mëtejshëm të marrëdhënieve dhe të partneritetit strategjik ndërmjet Kosovës dhe Shteteve të Bashkuara të Amerikës.

Në qendër të bisedës, sipas Presidencës, ishte bashkëpunimi në fushën e sigurisë dhe pozita e Kosovës në arenën ndërkombëtare. "Në këtë kontekst, Presidentja Shiroka Pula theksoi rëndësinë e forcimit të bashkëpunimit ndërmjet dy vendeve dhe të vazhdimit të koordinimit të ngushtë për çështjet me interes të përbashkët, në funksion të ruajtjes së paqes dhe sigurisë rajonale, si dhe të zhvillimit dhe avancimit të pozitës ndërkombëtare të Kosovës", thuhet në komunikatë.