Rrinte pranë Varrezave të Dëshmorëve në Kaçanik, policia i gjen pistoletën me 12 fishekë

Një patrullim rutinë në Kaçanik përfundoi me një konfiskim arme. Të martën mbrëma, rreth orës 22:10, zyrtarë policorë të Njësisë së Hetimeve të Stacionit Policor në Kaçanik vunë re një burrë që qëndronte më këmbë në parkingun e Varrezave të Dëshmorëve.

Gjatë kontrollit të dokumenteve dhe verifikimit, policia gjeti te personi i identifikuar me inicialet B.G., 45-vjeçar, një pistoletë së bashku me një karikator me 12 fishekë.

I dyshuari u shoqërua në stacionin policor për intervistim, ndërsa për rastin u njoftua edhe prokurori i shtetit. Me urdhër të prokurorit, çështja u iniciua për veprën penale "Mbajtje në pronësi, kontroll ose posedim i paautorizuar i armës".

Arma e zjarrit u konfiskua. 45-vjeçari u lirua, ndërsa rasti do të vazhdojë në procedurë të rregullt hetimore. Sipas ligjit, ai konsiderohet i pafajshëm derisa të vendosë gjykata.