Rrezik serioz për jetën e punëtorëve: ndalohen punimet në një kantier në Ferizaj

Punimet në një kantier ndërtimi në komunën e Ferizajt janë ndalur menjëherë me vendim të Inspektoratit Qendror të Punës, pasi inspektorët gjetën atje shkelje të rënda të dispozitave ligjore për sigurinë dhe shëndetin në punë.

Sipas njoftimit të Inspektoratit Qendror të Punës, kontrolli u zhvillua në kuadër të mbikëqyrjes së zbatimit të legjislacionit të punës. "Gjatë inspektimit janë konstatuar shkelje të rënda të dispozitave ligjore, të cilat paraqisnin rrezik serioz për jetën dhe shëndetin e punëtorëve. Si rezultat, Inspektorati Qendror i Punës ka marrë vendim për ndalimin e menjëhershëm të punimeve në kantier deri në eliminimin e plotë të parregullsive të evidentuara", thuhet në njoftimin e institucionit.

Ndalimi mbetet në fuqi derisa operatori i kantierit të heqë çdo mangësi të gjetur. "Këto masa synojnë parandalimin e aksidenteve në vendin e punës dhe garantimin e kushteve të sigurta për punëtorët. Subjekti i inspektuar është obliguar të eliminojë të gjitha mangësitë e konstatuara, ndërsa punimet do të lejohen të rifillojnë vetëm pasi inspektorët të verifikojnë se janë përmbushur kërkesat ligjore dhe standardet e sigurisë dhe shëndetit në punë", theksohet më tej.

Inspektorati nuk e ka bërë publik emrin e subjektit të inspektuar dhe as natyrën konkrete të parregullsive të gjetura në terren.

Institucioni paralajmëron se kontrollet do të shtrihen edhe më gjerë: "Inspektorati Qendror i Punës mbetet i përkushtuar në zbatimin e ligjit dhe do të vazhdojë kontrollet intensive në të gjithë territorin e Republikës së Kosovës, duke ndërmarrë masa ndaj çdo subjekti që cenon sigurinë dhe shëndetin e punëtorëve. Njëkohësisht, Inspektorati Qendror i Punës u bën thirrje të gjithë punëdhënësve që të respektojnë me përpikëri dispozitat ligjore dhe të sigurojnë kushte të sigurta pune, pasi mbrojtja e jetës dhe shëndetit të punëtorëve mbetet prioritet i panegociueshëm".