Rrafshuesja e asfaltit përmbyset në Valtopina, vdes 20-vjeçari shqiptar

Një rrafshuese asfalti u përmbys mëngjesin e sotëm në rrugën Santa Cristina të Valtopinës, në Itali, dhe zuri poshtë të riun shqiptar që e drejtonte. R. A., 20 vjeç, banues në Trevi, nuk arriti të mbijetonte.

I riu po punonte së bashku me punonjës të tjerë në asfaltimin e rrugës, një aks që lidh zonën e impianteve sportive me kodrat përreth. Bashkia e Valtopinës kishte vendosur të ndërhynte për ta përmirësuar, pasi pjesa më e madhe e saj ishte ende e paasfaltuar.

Sipas informacioneve të para nga Italia, mjeti u përmbys gjatë punës dhe e mbërtheu poshtë tij. Kolegët dhanë menjëherë alarmin. Në vend mbërritën personeli mjekësor i urgjencës 118 dhe zjarrfikësit, ndërsa nga Foligno u ngrit helikopteri i emergjencës Nibbio. Plagët ishin tepër të rënda dhe, pavarësisht ndërhyrjes së ekipeve të shpëtimit, 20-vjeçari ndërroi jetë.

Karabinierët kanë nisur hetimet për të zbardhur rrethanat e plota të ngjarjes. Ende nuk dihet pse u përmbys mjeti dhe si përfundoi i riu poshtë tij.

Kryetari i bashkisë së Valtopinës, Gabriele Coccia, ndodhej jashtë qytetit për arsye pune kur mori lajmin dhe vendosi të kthehej menjëherë. Në rrjetet sociale ai shprehu dhimbjen për humbjen e jetës së të riut dhe ngushëllimet për familjen. "Administrata bashkiake shpreh dhimbjen e saj të thellë për humbjen tragjike", thuhet në reagimin e publikuar pas aksidentit.

Vdekja e 20-vjeçarit ka tronditur komunitetin e vogël të Valtopinës.