Shembet pllaka e betonit në një ndërtim në Prizren, pesë punëtorë të lënduar

Një pllakë betoni është shembur në një objekt në ndërtim në Prizren, duke lënë të lënduar pesë punëtorë.

Rastin e ka konfirmuar Shaqir Bytyqi, zëdhënës i Policisë për rajonin e Prizrenit. Sipas tij, njëri nga punëtorët ka pësuar lëndime më të rënda në këmbë, ndërsa katër të tjerët janë liruar.

"Ka të lënduar, bëhet fjalë për pesë punëtorë. Njëri prej tyre është me lëndime pak më të rënda në këmbë, të tjerët janë liruar në procedurë të rregullt", deklaroi Bytyqi.

Pamjet nga kantieri, të shpërndara menjëherë pas incidentit, tregojnë disa punëtorë të shqetësuar pranë një pllake të madhe që kishte rënë në tokë. Në orët e para pas shembjes dyshohej se disa prej tyre kishin mbetur të zënë nën material.

Shkaku i shembjes ende nuk dihet.