Rasti "Onima": Gjesti dënohet me dy vjet burg me kusht dhe 6 mijë euro gjobë

Këngëtari Besart Kelmendi, i njohur me emrin artistik Gjesti, është dënuar me dy vjet burgim me kusht dhe me 6 mijë euro gjobë, pas marrëveshjes për pranimin e fajësisë të arritur me Prokurorinë në çështjen që lidhet me shtëpinë muzikore "Onima".

Kelmendi u paraqit në gjykatë në kuadër të procesit që ka të bëjë me mosmarrëveshjet e tij me pronarin e kompanisë "Onima", Erkand Shabani. Gjatë seancës, mbrojtja e tij kërkoi arritjen e marrëveshjes për pranimin e fajësisë. Kërkesa u kundërshtua fillimisht nga pala e dëmtuar, por gjykata e pranoi marrëveshjen.

Kundërshtimin më të ashpër e artikuloi avokati Besnik Berisha, përfaqësues i "Onima-s", i cili tha se Prokuroria ishte treguar dorëlirë ndaj Kelmendit. "Ligjshmëria u shndërrua në mëshirë", deklaroi Berisha, duke pretenduar se asnjë qytetar tjetër i Republikës së Kosovës nuk do ta gëzonte një privilegj të tillë.

Kelmendi ishte arrestuar më 11 mars për këtë rast, nën dyshimin për tri vepra penale: "Armëmbajtje pa leje", "Kanosje" dhe "Asgjësim apo dëmtim i pasurisë". Para disa muajsh ishin publikuar edhe pamjet që tregonin momentin kur ai hyri në ambientet e shtëpisë muzikore "Onima", një ngjarje që kishte bërë bujë të madhe në media dhe në opinionin publik.