ReklamëHapësirë reklame
ReklamëHapësirë reklame
Reklamë
Inspektimi në Gjykatën Themelore në Pejë arrin në përfundimin se urdhri për mbrojtje emergjente për Arlinda Zekaj-Sylajn nuk u ndërpre asnjëherë dhe se vendimet iu dërguan Policisë së Kosovës për zbatim. Këshilli Gjyqësor mohon gjithashtu se kryesuesi i tij kishte marrë ndonjë kërkesë prej saj.
Arlinda Zekaj-Sylaj e kishte urdhrin për mbrojtje të vlefshëm gjatë gjithë kohës, deri ditën kur u vra. Ky është përfundimi kryesor i inspektimit që Këshilli Gjyqësor i Kosovës (KGjK) zhvilloi në Gjykatën Themelore në Pejë, pas vrasjes së gruas më 25 tetor në Pejë. Sipas Këshillit, të dy vendimet e gjykatës për mbrojtjen e saj i ishin përcjellë Policisë së Kosovës për ekzekutim.
Inspektimi nisi më 26 tetor, pas një kërkese urgjente me shkrim të kryesuesit të KGjK-së drejtuar Njësisë për Inspektim Gjyqësor, për shqyrtimin e dokumentacionit dhe të veprimeve të gjykatës në lëndën C.nr.1300/2026. Sipas komunikatës së Këshillit, "puna ekipore është finalizuar me datën: 28.10.2026, duke ndërtuar një dosje fizike me të gjitha materialet e inspektuara dhe shkresat tjera. Raporti final është dorëzuar në Këshill me datë: 28.10.2026".
Kronologjia që rindërton raporti nis më 7 shtator 2026. Atë ditë, gjykata pranoi kërkesën për shqiptimin e urdhrit mbrojtës emergjent, e regjistroi në regjistrin manual dhe në sistemin elektronik SMIL, në përputhje me Rregulloren nr.17/2024 dhe Shtojcën 2, dhe me aktvendim të së njëjtës datë caktoi urdhrin për mbrojtje emergjente për Arlinda Zekaj-Sylajn.
Sipas KGjK-së, pala e mbrojtur dhe përfaqësuesi për mbrojtjen e viktimave e kundërshtuan atë vendim vetëm në një pikë: pikën III të dispozitivit, që kishte të bënte me besimin e fëmijës dhe alimentacionin, jo me vetë lëshimin e urdhrit. Më 16 tetor 2026, me aktvendimin C.nr.1300/2026, gjykata e aprovoi kërkesën e palës së mbrojtur. Asnjëra palë nuk paraqiti ankesë.
Këshilli thekson se, bazuar në shkresat e lëndës, Zekaj-Sylaj "gjatë gjithë kohës ka pasur të caktuar Urdhrin për mbrojtje". Në procedurë kishte vetëm dy palë: ajo, si palë e mbrojtur, dhe bashkëshorti i saj, Jeton Sylejman Sylaj, si palë përgjegjëse. Sipas raportit, "në asnjë shkresë të lëndës nuk është përfshirë tani i dyshuari për kryerjen e veprës penale të vrasjes, Albert Sylaj".
Raporti evidenton edhe një hap të mëtejshëm procedural. Më 26 tetor, në orën 8.56, pra pas vrasjes, Gjykata Themelore në Pejë pranoi aktakuzën e Prokurorisë Themelore në Pejë me numër PP/II Nr. 1340/2026 kundër Jeton Sylajt. Aktakuza u regjistrua menjëherë me numrin P.nr. 832/2026 dhe numrin unik SMIL 2026:208789.
Një pjesë e komunikatës u kushtohet ankesave që vetë Zekaj-Sylaj kishte ngritur ndaj gjykatës. Më 17 shtator 2026, ajo i ishte drejtuar me kërkesë kryetarit të Gjykatës Themelore në Pejë, duke pretenduar se gjyqtari i çështjes kishte vendosur në mënyrë të kundërligjshme dhe pas afateve ligjore. Sipas KGjK-së, kryetari i kërkoi informacion gjyqtarit po atë ditë dhe gjyqtari u përgjigj po atë ditë. Përgjigjja zyrtare për të, me shkresën GJA.nr.197/26, mbërriti më 20 tetor, pesë ditë para vrasjes, me sqarimin e veprimeve të ndërmarra nga gjykata.
Këshilli hodhi poshtë kategorikisht raportimet se kryesuesi i tij kishte pranuar kërkesë nga viktima, duke deklaruar se "këto informacione nuk janë të vërteta". Sipas KGjK-së, Sekretariati i Këshillit konfirmoi me shkrim se deri më 28 tetor 2026 "nuk është pranuar asnjë kërkesë nga tani e ndjera Arlinda Zekaj-Sylaj", pas kontrollit të regjistrit fizik të shkresave në zyrën e pranimit, në Sekretariat dhe në postën zyrtare elektronike të institucionit.
Komunikata mbyllet me një paralajmërim. KGjK thotë se është e vendosur të ndërmarrë të gjitha veprimet e nevojshme ligjore, "pa përjashtuar të gjitha masat eventuale ndaj të gjitha atyre që konstatohet se veprimet ose mos veprimet e tyre janë në kundërshtim me legjislacionin në fuqi".
Shteti i Kosovës do të hyjë me strategji të veçantë në betejën e apelit të krerëve të UÇK-së para Dhomave të Specializuara. Grupi punues që do ta hartojë atë mbajti mbledhjen e parë nën drejtimin e Glauk Konjufcës.
