Rahovec: I maskuar tenton të grabisë dy punëtorë në pompën e derivateve, shtie dy herë dhe arratiset

Një person i maskuar dhe i armatosur u përpoq të grabiste dy punëtorë të një pompe derivatesh në Rahovec në orët e para të mëngjesit të sotëm, para se të hapte zjarr dhe të arratisej pa u gjetur.

Ngjarja ndodhi rreth orës 01:30 në rrugën "Sheh Mihedini", te pompa e derivateve "SHELL". Sipas rrëfimit të ngjarjes, dy punëtorët — të identifikuar me inicialet G.R., rreth 36 vjeç, dhe H.K., rreth 42 vjeç — po qëndronin jashtë objektit kur nga drejtimi i fshatit Brestovc iu afrua një person i maskuar, i veshur me rroba kamuflazhi dhe me një pistoletë në dorë.

I dyshuari u drejtohet me fjalët "Mos lëvizni", por, sapo e panë të maskuar dhe të armatosur, të dy punëtorët nisën të ikin në drejtime të kundërta: njëri prapa objektit të pompës dhe tjetri drejt qytetit. Gjatë ikjes së tyre, i maskuari qëlloi dy herë me pistoletë e më pas u largua në drejtim të panjohur.

Njëri nga punëtorët pësoi një lëndim në shpinë. Të dy u dërguan në Qendrën Kryesore të Mjekësisë Familjare (QKMF) në Rahovec për trajtim mjekësor.

Patrullat policore mbërritën në vendngjarje rreth orës 01:45, por i dyshuari nuk u gjet. Në vend u gjet një gëzhojë e kalibrit 9 milimetra, e cila dyshohet se i përket një fisheku me gaz. Forenzika dhe hetuesit policorë kryen ekzaminimin e vendngjarjes dhe mbledhjen e provave.

Për rastin u njoftua prokurori kujdestar, me udhëzimin e të cilit u inicua rasti si "Grabitje në tentativë". I dyshuari nuk është identifikuar ende dhe rasti mbetet nën hetim.