Prokurorja e rastit të Donjeta Pajazitajt në krye të Prokurorisë së Pejës, reagon vëllai

Prokurorja që ka mbajtur dosjen e vrasjes së Donjeta Pajazitajt tani ndodhet në krye të Prokurorisë Themelore të Pejës. Valbona Dishaj-Haxhosaj është caktuar ushtruese e detyrës së kryeprokurores, dhe vendimi ka shkaktuar menjëherë revoltën e familjes së viktimës.

Emërimi erdhi pas suspendimit të kryeprokurores Lumturije Vuçetaj. Masa ndaj saj u mor pas lëshimeve dhe dështimeve institucionale në trajtimin e rastit të Arlinda Zekajt, gruas që u vra nga ish-kunati i saj.

Shkëlqim Pajazitaj, vëllai i Donjetës, e kundërshtoi ashpër vendimin përmes një reagimi në Facebook. Ai kujton se Dishaj-Haxhosaj ishte prokurore pikërisht në dosjen e motrës së tij, një rast që edhe shumë vite pas vrasjes nuk ka marrë drejtësi përfundimtare.

"Në vend që të bëhet thirrje për #Drejtësi, ky vendim po e thellon edhe më shumë mosbesimin tim ndaj sistemit të drejtësisë! Si është e mundur që Valbona Disha Haxhosaj të emërohet në krye të prokurorisë, ndërsa rasti i motrës sime, Donjeta Pajazitaj, edhe pas 11 vjetësh ende nuk ka marrë një epilog përfundimtar?", shkroi Pajazitaj.

Ai ngre pyetjen se kush mban përgjegjësi për vitet e humbura dhe u drejtohet institucioneve me kërkesa konkrete: "Kush do të japë përgjigje për këto vite pritjeje? Kush do të mbajë përgjegjësi për mënyrën se si është trajtuar rasti i Donjetës? Kërkoj transparencë, llogaridhënie dhe sqarime konkrete nga institucionet përkatëse. Familja ime ka të drejtë të dijë se çfarë ka ndodhur me rastin e motrës sime."