Profile të rreme shtojnë aktivitetin në Kosovë: narrativa përçarëse në prag të vendimit të Hagës

"Duhet të kallet edhe shtëpia jonë, që të mos gëzohen udbashat. Rusia dhe Serbia me çdo kusht e duan dënimin pikërisht për të kriminalizuar lirinë. Ju keni pasur qejf me formu Rusia dhe në fund me akuzu Thaçin që je frikësuar dhe s'ke guxuar ta formosh vetë?" Ky është një nga komentet e profileve false që gjatë ditëve të fundit janë bërë veçanërisht aktive në hapësirën online në Kosovë.

Profile të dyshimta dhe llogari të rreme në rrjetet sociale po e intensifikojnë aktivitetin e tyre në vend. Përmes postimeve, komenteve dhe thirrjeve që nxisin dhunë, urrejtje e përçarje, ato synojnë të ndikojnë në opinionin publik dhe të rrisin tensionet. Fokusi i shumë prej tyre është një pikë e vetme: vendimi i Gjykatës Speciale në Hagë për ish-krerët e Ushtrisë Çlirimtare të Kosovës.

Ekspertët e sigurisë kibernetike vërejnë se kjo valë nuk ka ardhur rastësisht, por pikërisht në një periudhë të ndjeshme, kur pritet aktgjykimi. Sipas tyre, mënyra e veprimit dhe koordinimi i llogarive ngre dyshime se nuk bëhet fjalë thjesht për reagime individuale të përdoruesve.

Hulumtuesi i sigurisë kibernetike, Halil Berisha, e cilëson këtë një formë të luftës online, që mund të përdoret për degradimin e situatës dhe nxitjen e dhunës. "Profilet e dyshimta që përdorin gjuhë nxitëse dhe polarizuese i kemi parë edhe në të kaluarën, por duket që aktualisht fokusi që kanë shumë prej tyre është vendimi i Gjykatës në Hagë. Kjo është shumë e natyrshme, pasi edhe shumë zyrtarë të lartë në Serbi kanë ngritur skenarë për trazira, si Aleksandar Vuçiq dhe Milovan. Pra, në këtë kontekst, aktiviteti i këtyre profileve të koordinuara mund të përdoret për të thelluar ndarjet, për të rritur tensionet dhe për të krijuar materiale që në të ardhmen mund të përdoren për të rritur narrativat propagandistike kundër Kosovës nga Serbia", tha Berisha.

Të njëjtën prirje e ka konstatuar edhe platforma Hibrid.info, e cila merret me verifikimin e informacioneve dhe monitorimin e narrativave dezinformuese. Nga monitorimi i saj janë identifikuar profile të dyshimta që përsërisin me shpejtësi narrativa të caktuara. "Ne kemi vërejtur profile të dyshimta dhe faqe në rrjetet sociale, të cilat përdoren në mënyrë të përsëritur për të shpërndarë përmbajtje të rreme, manipuluese dhe nxitëse, lidhur me zhvillimet politike dhe shoqërore në Kosovë. Disa narrativa përsëriten, amplifikohen dhe shpërndahen përmes një rrjeti të gjerë burimesh, duke e bërë efektin e tyre më të madh në hapësirën informative në Kosovë", thuhet nga platforma, e përfaqësuar nga Etrit Rexhepi.

Konteksti politik e ushqen këtë dinamikë. Gjatë ditëve të fundit, kreu i qeverisë së Serbisë ka bërë deklarata dhe ka përdorur gjuhë nxitëse lidhur me vendimin që pritet të shpallet në Hagë ndaj krerëve të UÇK-së.

Paralajmërimi i ekspertëve është i drejtpërdrejtë: hapësira online mund të shndërrohet në terren për përshkallëzimin e tensioneve, prandaj kërkohet kujdes i shtuar si nga qytetarët, ashtu edhe nga organet e sigurisë. Data e saktë e shpalljes së aktgjykimit ende nuk është bërë e ditur.