Prishtinë: Tentoi të vidhte bateritë e gjeneratorëve në parkingun nëntokësor, e ndalon roja

Plani dështoi para se të kryhej. Pak pas mesnatës së 23 gushtit, në parkingun nëntokësor te Katedralja, në "Parking Center" te Sheshi "Xhorxh Bush" në Prishtinë, një 20-vjeçar dyshohet se ishte futur në hapësirat e objektit me synimin për të marrë disa bateri të gjeneratorëve.

Punëtori i sigurimit që ndodhej në detyrë, A. I., 49 vjeç, e pikasi të riun gjatë veprimit dhe ndërhyri, duke e ndaluar para se tentativa për vjedhje të përfundonte.

Në vendngjarje u përfshi më pas Policia, e cila e shoqëroi të dyshuarin, A.N., 20 vjeç, në stacion për procedurat e mëtejshme. Ai është intervistuar në cilësinë e të dyshuarit, në praninë e një avokati mbrojtës të caktuar sipas detyrës zyrtare.

Për rastin është vënë në dijeni Prokurori kujdestar, i cili ka urdhëruar inicimin e procedurës për veprën penale "Vjedhje e rëndë në tentativë". Me vendim të prokurorit, 20-vjeçari është ndaluar për 48 orë.

I dyshuari prezumohet i pafajshëm derisa fajësia të mos provohet me vendim të formës së prerë të gjykatës.