Prishtina pret 200 mijë njerëz: Marshi për Liri niset në orën 14:00, transporti falas

Sheshi "Skënderbeu" është pika ku, në orën 14:00, niset "Marshi për Liri", tubimi më i madh qytetar i paralajmëruar në Kosovë në mbështetje të ish-krerëve të Ushtrisë Çlirimtare të Kosovës që gjykohen në Dhomat e Specializuara të Kosovës në Hagë. Organizatorët, platforma qytetare "Liria ka Emër", presin rreth 200 mijë pjesëmarrës.

Kryeqyteti ka hapur dyert për ardhësit nga e gjithë Kosova. Kryetari i Prishtinës, Përparim Rama, njoftoi se transporti urban dhe parkingu te Pallati i Rinisë janë pa pagesë. "PRISHTINA MIRËPRET TË GJITHË QYTETARËT NË MARSHIN PËR LIRI! Kryeqyteti gjithmonë do të mbetet shtëpia e dinjitetit dhe e zërit për drejtësi. Sot, transporti urban në Kryeqytet është FALAS! Parkingu te Pallati i Rinisë, Falas! Mirë se vini në Prishtinë!", shkroi Rama. Nga një numër i madh komunash të Kosovës është organizuar transport për pjesëmarrësit.

Marshi mbahet katër ditë para 16 shtatorit, datës kur pritet të shpallet aktgjykimi ndaj Hashim Thaçit, Kadri Veselit, Jakup Krasniqit dhe Rexhep Selimit, të akuzuar për krime lufte. Asnjë vendim nuk është marrë ende nga gjykata në Hagë.

Programi i tubimit parashikon tetë folës. Në emër të platformës "Liria ka Emër" do të flasin Ismail Tasholli dhe Eliza Hoxha, ndërsa shoqatat e dala nga lufta do të përfaqësohen nga Hysni Gucati. Para pjesëmarrësve do të dalë edhe Liriona Sulejmani, vajza e dëshmorit Bajram Sulejmani, si dhe Buna Mustafa, vajza e Salih Mustafës, i njohur si komandant "Cali". Fjalime do të mbajnë edhe kryetari i Aleancës, Ardian Gjini, dhe kryetari i PDK-së, Bedri Hamza. Në program pritet të performojnë Shkurte Fejza dhe Arif Vladi.

Ndër pjesëmarrësit pritet të jenë më shumë se 150 deputetë, kryetarë komunash dhe përfaqësues të institucioneve të vendit. Organizatorët kanë kërkuar që marshi të jetë qytetar, familjar, paqësor dhe dinjitoz, një tubim gjithëpërfshirës pa ndarje politike dhe pa simbole partiake, me fokus te mesazhi i qytetarëve në prag të vendimit në Hagë. Platforma e ka cilësuar nismën si mobilizim qytetar për drejtësi, dinjitet, kujtesë dhe mbështetje për ish-krerët e UÇK-së, ndërsa u ka bërë ftesë edhe liderëve të partive politike shqiptare që të jenë të pranishëm.

Në ditët para tubimit, mbështetja erdhi nga institucione, parti politike, bashkësi fetare, sindikata dhe organizata. Kryetari i Bashkësisë Islame të Kosovës, myftiu Naim Tërnava, shprehu mbështetje për nismën dhe gatishmëri për të kontribuar në organizim, me mesazhe solidariteti, uniteti dhe respekti për vlerat e luftës së UÇK-së. Ipeshkvi i Kosovës, Dodë Gjergji, u deklarua gjithashtu në mbështetje të marshit, pasi me përfaqësuesit e platformës diskutoi për solidaritetin me Thaçin, Veselin, Krasniqin dhe Selimin, si dhe me familjet e tyre.

Pjesëmarrjen e kanë konfirmuar edhe Sindikatat e Bashkuara të Arsimit, Shkencës dhe Kulturës, duke e lidhur atë me kërkesën për liri, drejtësi dhe dinjitet. Nga bota e biznesit, kryetari i Aleancës Kosovare të Bizneseve, Agim Shahini, deklaroi se bizneset, punëtorët, bashkëpunëtorët dhe familjarët e tyre do t'i bashkohen marshit në mënyrë masive, ndërsa kryetari i Odës Ekonomike të Kosovës, Lulzim Rafuna, tha se Oda qëndron në mbështetje të çlirimtarëve dhe të së drejtës për një proces të drejtë e të paanshëm.