Ndalohet në aeroportin “Adem Jashari” një 26-vjeçar me tri urdhër-arreste aktive

Një 26-vjeçar u ndalua në Aeroportin Ndërkombëtar “Adem Jashari” më 12 shtator, rreth orës 20:30, pasi verifikimi i të dhënave të tij nxori se ndaj tij ishin aktive tri urdhëresa të veçanta arresti, të lidhura me tri vepra të ndryshme penale.

Urdhëresa e parë kishte të bënte me veprën penale “Posedimi i paautorizuar i narkotikëve, substancave psikotrope dhe analoge”, ku një gjobë prej 500 eurosh i ishte shndërruar në 25 ditë burgim. Urdhër-arresti i dytë ishte lëshuar për veprën penale “Rrëmbimi”, me dënim prej 2 vjetësh e 2 muajsh burgim. Urdhëresa e tretë lidhej me veprën penale “Mbajtja në pronësi, kontroll apo posedim të paautorizuar të armëve”, për të cilën ishte shqiptuar po ashtu dënim prej 2 vjetësh e 2 muajsh burgim.

Pas realizimit të urdhëresave, 26-vjeçari është dërguar drejtpërdrejt në Qendrën e Paraburgimit në Hajvali, për vuajtjen e dënimit.

Bëhet fjalë për ekzekutimin e vendimeve gjyqësore tashmë të shqiptuara, e jo për një rast të ri hetimor. Deri tani nuk ka dalë ndonjë deklaratë publike e Policisë së Kosovës apo e prokurorisë lidhur me këtë ndalim.