AdvertisementAd space
AdvertisementAd space
Reklamë
Një platformë e krijuar nga Rusia në vitin 2024 mund të përpunojë tashmë rreth 20 për qind të pagesave ruse të tregtisë së jashtme, mbi 100 miliardë dollarë në vit, duke kombinuar banka të sanksionuara, kompani ndërmjetëse në vende të treta dhe kriptomonedha.
Një stejblkoin i mbështetur në rubla, një bankë e sanksionuar që financon sektorin ushtarak rus dhe një rrjet firmash ndërmjetëse nga Kirgizia deri në Hong Kong: kështu funksionon platforma financiare A7, e krijuar nga Rusia, e cila po shndërrohet në një nga instrumentet kryesore për anashkalimin e sanksioneve perëndimore dhe për ndërtimin e një sistemi alternativ pagesash ndërkombëtare.
Sipas një hetimi gazetaresk të The Wall Street Journal, të përcjellë nga Demostat, platforma e nisur në vitin 2024 mund të sigurojë tashmë rreth 20 për qind të pagesave ruse në tregtinë e jashtme, pra më shumë se 100 miliardë dollarë në vit. Në praktikë, A7 po zhvillohet si një infrastrukturë ruse e "bankingut gri", me qëllim uljen e varësisë së Moskës nga sistemi financiar perëndimor, veçanërisht nga SWIFT-i dhe nga llogaritjet në dollarë.
Modeli i saj ndërthur instrumente tradicionale financiare, një rrjet kompanish ndërmjetëse në vende të treta dhe mekanizma të bazuar në kriptovaluta. Një nga elementet kyçe të sistemit është stejblkoini në rubla A7A5, i cili, sipas të dhënave të raportuara, mbulohet nga depozitat e bankës ruse të sanksionuar Promsvjazbank dhe mund të konvertohet në USDT. Në funksionimin e sistemit janë të përfshira kompani dhe ndërmjetës financiarë në Kirgizi, në Emiratet e Bashkuara Arabe, në Hong Kong dhe në juridiksione të tjera.
Një strukturë e tillë mundëson fshehjen e origjinës ruse të pagesave, anashkalimin e kufizimeve të bankave perëndimore dhe ruajtjen e qasjes në kanalet financiare ndërkombëtare. Përmes A7 nuk kryhen vetëm pagesa për mallra civile, por edhe për mallra me përdorim të dyfishtë dhe për komponentë që mund të përdoren në kompleksin ushtarako-industrial rus.
Mbështetja politike dhe financiare e shtetit rus për platformën tregon karakterin sistemik të projektit. Ndër strukturat e lidhura me të përmendet edhe Promsvjazbank, e orientuar drejt ofrimit të shërbimeve financiare për sektorin e mbrojtjes së Rusisë. Në këtë kontekst, A7 nuk duhet parë si një nismë e veçuar kriptovalutash, por si pjesë e një strategjie më të gjerë të Kremlinit për krijimin e një infrastrukture financiare paralele.
Konteksti është i njohur: pas përjashtimit të bankave kryesore ruse nga sistemi SWIFT dhe vendosjes së sanksioneve të gjera si përgjigje ndaj pushtimit të plotë të Ukrainës në vitin 2022, Moska u përball me rrezikun e çrregullimeve të rënda në pagesat e tregtisë së jashtme. Përgjigjja ishte zhvillimi i përshpejtuar i mekanizmave alternativë të pagesave, duke shfrytëzuar vende të treta, valuta kombëtare, kriptopasuri dhe rrjete kompanish ndërmjetëse.
Shfaqja e A7 tregon se sistemi financiar rus po përshtatet me sanksionet më shpejt sesa arrijnë të reagojnë mekanizmat tradicionalë të kontrollit. Sanksionet e drejtuara ndaj personave juridikë apo bankave të veçanta mbeten të pamjaftueshme nëse njëkohësisht funksionojnë kanale ndërmjetësimi në vende të treta. Prej këtu vjen edhe rekomandimi që rregullatorët ndërkombëtarë të kalojnë nga një model kryesisht reagues i sanksioneve në kontroll parandalues: zbulim i hershëm i platformave të reja të pagesave, i rrjeteve të kompanive fiktive, i instrumenteve kriptovalutore dhe i ndërmjetësve financiarë.
Vëmendje e veçantë i kërkohet juridiksioneve nëpër të cilat kalojnë vëllime të mëdha pagesash ruse. Kirgizia, Emiratet e Bashkuara Arabe, Hong Kongu dhe qendra të tjera financiare rrezikojnë të bëhen hallka kyçe të infrastrukturës ruse për anashkalimin e sanksioneve. Pa një kontroll efikas të bankave, të kompanive financiare dhe të platformave kriptovalutore në ato juridiksione, regjimi i sanksioneve do ta humbasë gradualisht efektin shtrëngues.
Shtetet perëndimore, sipas të njëjtit vlerësim, do të duhej t'i zbatonin më aktivisht sanksionet dytësore ndaj institucioneve financiare dhe kompanive që mundësojnë në mënyrë sistematike funksionimin e mekanizmave rusë të anashkalimit. Sfidë e veçantë mbetet përdorimi i kambialeve, i faturave fiktive, i kompanive fiktive dhe i kriptovalutave, një kombinim që krijon zinxhirë financiarë shumështresorë dhe e vështirëson përcaktimin e marrësit përfundimtar të mjeteve.
Ambiciet e projektit duken afatgjata. Zgjerimi i mundshëm i aktiviteteve të A7 në tregtinë me ar, si dhe në tregjet e Afrikës, të Lindjes së Mesme dhe të Amerikës Latine, tregon se Moska po përpiqet të ndërtojë një infrastrukturë financiare më pak të varur nga dollari, nga bankat perëndimore dhe nga sistemet tradicionale ndërkombëtare të pagesave.
Paralelisht me këtë, Kremlini zhvillon një fushatë informative për diskreditimin e politikës së sanksioneve dhe për krijimin e përshtypjes te opinioni ndërkombëtar se ato kanë karakter gjoja të paligjshëm ose politikisht të motivuar. Mediat ruse publikojnë rregullisht pretendime për "paligjshmërinë" dhe "pabazueshmërinë" e sanksioneve, duke cituar veçanërisht presidentin rus Vladimir Putin, i cili i cilëson kufizimet si "të provokuara".
Sanksionet e para ndërkombëtare kundër Rusisë u vendosën në vitin 2014, pas okupimit të Krimesë dhe fillimit të agresionit rus në lindje të Ukrainës. Pas sulmit të plotë ndaj Ukrainës në shkurt të vitit 2022, Bashkimi Evropian, Shtetet e Bashkuara të Amerikës, Mbretëria e Bashkuar, Japonia, Koreja e Jugut, Australia dhe shtete të tjera i zgjeruan ndjeshëm masat kufizuese. Rezoluta ES-11/1 e Asamblesë së Përgjithshme të OKB-së e dënoi agresionin rus kundër Ukrainës dhe kërkoi ndërprerjen e përdorimit të forcës, duke iu referuar shkeljes së parimeve themelore të Kartës së OKB-së, përfshirë sovranitetin dhe integritetin territorial.
Ndërkohë, kursi i sanksioneve nuk ecën me të njëjtin ritëm në të dy anët e Atlantikut: Senati amerikan e ka miratuar ligjin e Grejemit për sanksione kundër Rusisë, ndërsa Bashkimi Evropian ende nuk ka arritur marrëveshje për paketën e 21-të të sanksioneve.
Kryetari i Prishtinës, Përparim Rama, u kërkoi asamblistëve votën për dhënien në shfrytëzim të "Tulltores" për 50 vjet, duke insistuar se toka nuk falet dhe se komuna do të përfitojë mbi 50 milionë euro gjatë kësaj periudhe.
