Përleshje me thikë në Pejë: theret një person, arrestohen tre të mitur

Një përleshje në qendër të Pejës mëngjesin e 18 gushtit 2026 përfundoi me gjak: një person u therr me thikë, ndërsa një tjetër pësoi lëndime të lehta trupore. Policia arrestoi tre të mitur si të dyshuar për sulmin.

Sipas raportit policor të datës 19 gusht 2026, ngjarja ndodhi rreth orës 09:40 në rrugën "Agim Qela".

"Raportohet se janë arrestuar tre të dyshuar të mitur meshkuj kosovarë, pasi që pas një përleshjeje dyshohet se kanë therur me thikë viktimën mashkull kosovar, ndërsa viktima tjetër mashkull kosovar ka pësuar lëndime të lehta", thuhet në raportin policor.

Të dy të lënduarit u dërguan për trajtim mjekësor, sipas policisë.

Gjatë veprimeve policore, nga të dyshuarit u konfiskuan një thikë dhe një pistoletë me gaz. Pas intervistimit, me vendim të prokurorit, tre të miturit e dyshuar u dërguan në mbajtje.

Rasti është iniciuar për veprat penale "Lëndim i rëndë trupor", "Lëndim i lehtë trupor" dhe "Mbajtja në pronësi, kontroll ose posedim të paautorizuar të armëve".