Panik në fluturimin Prishtinë-Basel: një udhëtare pranë alivanosjes, një tjetër thyen xhamin

Dy emergjenca, njëra pas tjetrës, në më pak se një orë fluturim. Avioni i kompanisë easyJet nga Prishtina për në Basel, i planifikuar të nisej në orën 20:05 të mbrëmjes së së hënës nga Aeroporti Ndërkombëtar i Prishtinës “Adem Jashari”, u shndërrua në skenë paniku për udhëtarët në bord.

Alarmi i parë ra rreth gjysmë ore pas ngritjes. Një grua rreth 40-vjeçare u ndie papritur keq. Sipas pasagjerëve, ajo dyshohet se pësoi rënie akute të tensionit të gjakut dhe ankth të theksuar, aq sa ishte pranë alivanosjes. Ekuipazhi pyeti përmes altoparlantit nëse në avion ndodhej ndonjë mjek.

Thirrjes iu përgjigj një neurokirurg kosovar që punon në një spital në Gjermani dhe që udhëtonte në të njëjtin fluturim. Ai e përshkroi gjendjen e pacientes si aritmi akute të rëndë, të shoqëruar me hiperventilim, marramendje dhe sulm paniku. “Unë, pa hezitim, u ngrita dhe i ofrova ndihmë profesionale pacientes, ashtu siç e kërkojnë detyra dhe profesioni im”, tha ai. Në ndihmë iu bashkua edhe një infermiere e re, ndërsa ekuipazhi qëndroi në gatishmëri. Pasi gjendja e udhëtares u stabilizua, mjeku i sugjeroi ekuipazhit se fluturimi mund të vazhdonte pa ulje emergjente.

Qetësia nuk zgjati shumë. Rreth gjysmë ore më vonë, nga pjesa e prapme e aeroplanit u dëgjua një zhurmë e fortë. Një udhëtar rreth 42-vjeçar, shtetas zviceran me prejardhje nga Kosova, dyshohet se shfaqi papritur sjellje agresive dhe të dhunshme, pa ndonjë shkak të dukshëm. Sipas dëshmive të pasagjerëve, ai theu me forcë xhamin e brendshëm të dritares pranë ulëses së tij. Udhëtarët në atë pjesë të avionit u kapluan nga paniku.

Ekuipazhi i kërkoi sërish mjekut të vlerësonte gjendjen psikofizike të pasagjerit. “Kur iu afrova, personi, ndonëse dukej fizikisht stabil, nuk fliste asnjë fjalë dhe nuk reagonte ndaj pyetjeve të mia”, rrëfeu neurokirurgu. Ai shtoi se pa analiza nuk mund të nxirret përfundim për shkakun e sjelljes: “Nuk mund të konfirmoj nëse ishte nën ndikimin e ndonjë medikamenti apo në një gjendje çrregullimi ose sforcimi mendor në momentin e kryerjes së veprimit, pa iu nënshtruar analizave përkatëse.”

Deri në fund të fluturimit, burri u mbajt nën mbikëqyrjen e disa pasagjerëve. Pas uljes në Aeroportin e Baselit, ai u mor në kontroll nga xhandarmëria e aeroportit, ndërsa nuk dihet ende nëse ndaj tij janë marrë masa ligjore.

Dëshmitarët e përshkruan atmosferën në kabinë si tejet të tensionuar, me shumë pasagjerë, mes tyre edhe familje me fëmijë, në panik. Mjeku, megjithatë, veçoi sjelljen e personelit në bord: sipas tij, në të dyja rastet “ekuipazhi i easyJet-it u tregua shumë profesional, human dhe mbështetës. Pavarësisht situatës, pjesëtarët e ekuipazhit arritën ta mbanin atë nën kontroll me qetësi dhe përkushtim”.