Paga e 13-të anashkalon punëtorët e RTK-së: Murati thotë se nuk janë në listën e Thesarit

Punëtorët e Radiotelevizionit të Kosovës (RTK) kanë mbetur jashtë pagës së 13-të. Sipas ministrit të Financave, Hekuran Murati, arsyeja është se ata nuk figurojnë në listën e pagave që ekzekuton Thesari i Shtetit. Murati e dha këtë shpjegim në seancën e Kuvendit të Kosovës, duke iu përgjigjur deputetes së PDK-së, Ganimete Musliu, e cila kërkoi sqarime pse kjo pagesë nuk është realizuar për punëtorët e transmetuesit publik.

"Vendimi i marrë në Qeveri parasheh pagën e 13-të për të gjithë punonjësit që marrin pagë nga buxheti i shtetit, pra që janë në llogarinë apo në listën e pagave që ekzekutohen nga Thesari. Në këtë rast punëtorët e RTK-së nuk janë pjesë e listës së pagave që ekzekutohen nga Thesari, sepse nuk janë organizatë buxhetore", tha Murati.

Thelbi i argumentit të ministrit qëndron te statusi i RTK-së. Ai theksoi se transmetuesi publik është entitet i veçantë juridik dhe se financimi i tij rregullohet nga Kuvendi, jo nga Qeveria. "Çështja e buxhetit apo pagesave të punëtorëve të RTK-së i takon RTK-së. Pra, është entitet i veçantë juridik, nuk është pjesë e ndarjeve buxhetore apo pjesë si organizatë buxhetore në ligjin e buxhetit", deklaroi ai.

Murati shpjegoi se, në mungesë të një buxheti ose të një forme financimi të përcaktuar nga Kuvendi, Qeveria ka vazhduar ta subvencionojë RTK-në. Sipas tij, vendimi se si shpërndahen këto mjete i takon menaxhmentit të transmetuesit publik. "Qeveria ndan shumën totale si subvencion, ndërkaq RTK-ja menaxhon dhe përcakton se cila pjesë apo sa prej asaj shume shkon në paga, sa prej asaj shume shkon në shpenzime të tjera operacionale dhe sa prej asaj shume shkon edhe në investime në pajisje", tha ministri.

Musliu nuk e pranoi këtë shpjegim. Ajo argumentoi se punëtorët e RTK-së paguhen nga taksat e qytetarëve dhe për këtë arsye duhet të trajtohen njësoj si punëtorët e tjerë të sektorit publik. "Arsyetimi yt është i pavend, sepse edhe punëtorët e Radiotelevizionit të Kosovës paguhen prej taksave të qytetarëve të Republikës së Kosovës si të gjithë punëtorët e tjerë ose shërbyesit e tjerë civilë. Prandaj është e padrejtë që të thoni që ata paguhen me pare të tjera dhe jo me pare të buxhetit të shtetit", i tha ajo ministrit.

Deputetja e PDK-së e zhvendosi më pas vëmendjen te drejtuesit e transmetuesit publik, duke paralajmëruar se do t'u kërkojë llogari për mosrealizimin e pagës së 13-të. "Meqë jam pjesë e komisionit parlamentar që i trajton këto çështje, unë do të merrem edhe me menaxhmentin e Radiotelevizionit të Kosovës dhe do të kërkoj përgjegjësi dhe llogari prej tyre pse punëtorët e Radiotelevizionit të Kosovës diskriminohen nga paga e 13-të", tha Musliu.