Operacioni "Muzgu" në Mitrovicë: kokainë, armë dhe një shufër me mbishkrimin "POLIC"

Një shufër metalike me mbishkrimin "POLIC" është një ndër sendet që Policia e Kosovës thotë se i ka sekuestruar gjatë kontrollit të një shtëpie dhe të një lokali në fshatin Kqiq i Madh të Mitrovicës. Sipas raportit 24-orësh të Policisë së Kosovës, rasti ka ndodhur të hënën rreth orës 09:15, gjatë operacionit policor të koduar "Muzgu".

Objektet e kontrolluara, një shtëpi dhe një lokal, sipas policisë, janë pronë e një personi mashkull kosovar, i cili trajtohet si i dyshuar.

Në njoftimin policor thuhet: "Policia e Kosovës, përmes Drejtorisë për Hetimin e Trafikimit me Narkotikë, DHTN Mitrovicë-Jug, në koordinim me Prokurorinë Themelore në Mitrovicë dhe me asistim të njësive relevante policore, përfshirë NjRSh dhe njësinë K-9, ka realizuar operacionin policor të koduar “Muzgu”. Në kuadër të këtij operacioni është realizuar kontrolli i një shtëpie dhe një lokali, ku gjatë kontrollit janë gjetur dhe sekuestruar: rreth 110.6 gramë substancë e dyshuar narkotike e llojit kokainë; një revole M57, kalibër 7.62 mm, së bashku me dy karikatorë; një pushkë gjuetie, kalibër 12 mm; nëntë fishekë të kalibrit 7.62 mm; dy fishekë të kalibrit 9×19 mm; katër fishekë për pushkë gjuetie, kalibër 12 mm; një peshore digjitale; 150 euro dhe 6,000 dinarë serbë; dy radiolidhje; si dhe një shufër metalike me mbishkrimin ‘POLIC’".

Dokumentimi, evidentimi dhe sekuestrimi i provave materiale, sipas të njëjtit raport, është kryer nga njësia rajonale e kriminalistikës, në përputhje me procedurat përkatëse.

Në momentin e kontrollit, personi i dyshuar nuk është gjetur në lokacion. Ai është paraqitur më vonë në zyrat policore, në prani të avokatit mbrojtës.

Për vazhdimin e procedurës, policia bën të ditur: "Me autorizim të Prokurorit të Shtetit, rasti është iniciuar për veprat penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”, sipas nenit 267, si dhe “Mbajtja në pronësi, kontroll ose posedim i paautorizuar i armëve”, sipas nenit 366 të Kodit Penal të Republikës së Kosovës. Me vendim të Prokurorit të Shtetit, personi i dyshuar është ndaluar për 48 orë."

I dyshuari nuk është identifikuar me emër nga autoritetet dhe, sipas parimit të prezumimit të pafajësisë, ai mbetet vetëm i dyshuar deri në një vendim të gjykatës.