Nxori trupin nga xhami i kulmit të veturës në lëvizje, shoferi gjobitet në Suharekë

Një shofer në Suharekë është gjobitur me 150 euro dhe një pikë negative pasi lejoi një pasagjer të nxirrte trupin nga vetura ndërsa ajo lëvizte, në rrugën "Brigada 123".

Rasti doli në pah pas një raportimi të qytetarëve përmes aplikacionit "Lajmëro Policinë". Në pamjet e pranuara shihej një qytetar duke dalë mbi automjet përmes xhamit të kulmit, derisa vetura ishte në lëvizje.

Sipas Policisë së Kosovës, raportimi u bë më 15 gusht 2026, ndërsa kundërvajtësi u identifikua tri ditë më vonë, më 18 gusht. Pasi u gjet, atij iu shqiptua vendimi për kundërvajtje, me gjobë prej 150 eurosh dhe një pikë negative.

Policia e Kosovës u ka bërë thirrje pjesëmarrësve në komunikacion që të respektojnë rregullat e trafikut, të shmangin shpejtësinë e lartë dhe sjelljet e rrezikshme, për ruajtjen e jetës dhe sigurisë së qytetarëve.