Tragjedi në Rahovec: i mituri ndërron jetë nga plaga me armë zjarri

Një i mitur ka ndërruar jetë sonte në fshatin Bellacerkë të Rahovecit, pasi u gjet i shtrirë në vendbanimin e tij me një plagë që dyshohet se është shkaktuar nga arma e zjarrit. Ai u dërgua për trajtim mjekësor, por mjekët konstatuan vdekjen e tij.

"Sot, rreth orës 20:20, në fshatin Bellacerkë të Rahovecit, në vendbanimin e tij është gjetur një i mitur i shtrirë, me plagë që dyshohet të jetë shkaktuar nga arma e zjarrit. I njëjti është dërguar për trajtim mjekësor, ku mjekët kanë konstatuar vdekjen e tij", ka bërë të ditur Policia e Kosovës.

Sipas Policisë, në vendin e ngjarjes është gjetur dhe sekuestruar një armë zjarri, e cila është marrë si provë materiale. Në konsultim me Prokurorin e Shtetit, rasti është iniciuar si "Hetim i vdekjes", ndërsa trupi i pajetë do të dërgohet në Institutin e Mjekësisë Ligjore.

Njësitë përkatëse policore, në koordinim me Prokurorin e Shtetit, po ndërmarrin veprimet hetimore për të sqaruar plotësisht rrethanat e ngjarjes. Rrethanat në të cilat u shkaktua plaga mbeten të pasqaruara, ndërsa identiteti dhe mosha e viktimës nuk janë bërë publike, për shkak të mbrojtjes së të miturit.