Kushtetuesja shpall të pavlefshëm aktgjykimin: punëtorit iu refuzuan pagat pa u dëgjuar asnjëherë

Dy instanca gjyqësore vendosën për pagat e nëntë viteve të një punëtori pa e thirrur asnjëherë në seancë. Gjykata Kushtetuese e Kosovës e ka quajtur këtë shkelje të së drejtës për gjykim të drejtë dhe të paanshëm dhe e ka shpallur të pavlefshëm aktgjykimin e Kolegjit të Apelit të Dhomës së Posaçme të Gjykatës Supreme.

Në qendër të rastit është Shevqet Gashi, punëtor i Ndërmarrjes Shoqërore "Lavërtari-Blegtori", i cili kërkonte kompensimin e pagave të papaguara për periudhën 2004-2013, si dhe dëmshpërblim për ndërprerjen e parakohshme të kontratës së punës. Kërkesat e tij i refuzoi Autoriteti i Likuidimit i Agjencisë Kosovare të Privatizimit, pas së cilës ai iu drejtua Dhomës së Posaçme të Gjykatës Supreme.

Në shkallën e parë, kërkesëpadia u aprovua pjesërisht, vetëm për periudhën 2011-2013. Pjesa tjetër u refuzua si e parashkruar, me arsyetimin se nuk ishte paraqitur brenda afatit trevjeçar. Pas ankesave, Kolegji i Apelit e aprovoi pjesërisht ankesën e Autoritetit të Likuidimit dhe ia refuzoi Gashit kompensimin e pagave për gjithë periudhën 2004-2013. Sipas atij vendimi, lista e pagave e dorëzuar nga Gashi ishte e printuar, e pavulosur dhe e panënshkruar, prandaj nuk u konsiderua provë e mjaftueshme për të vërtetuar borxhin e ndërmarrjes ndaj tij.

Asnjëra nga të dyja instancat nuk mbajti seancë dëgjimore. Pikërisht mbi këtë pikë Gashi e ndërtoi kërkesën në Kushtetuese, duke pretenduar se mosmbajtja e seancës ia kishte cenuar të drejtën për gjykim të drejtë.

Kushtetuesja i dha të drejtë. Sipas vlerësimit të saj, çështja nuk ishte thjesht ligjore apo e një natyre të lartë teknike, e cila do të mund ta justifikonte vendimmarrjen pa seancë. Gjykatat, thuhet në vendim, kishin trajtuar edhe çështje të rëndësishme faktike, përfshirë vlerësimin e listës së pagave dhe faktin se Autoriteti i Likuidimit nuk e kishte kontestuar shumën, por parashkrimin e kërkesës.

Për këtë arsye, Gjykata konstatoi shkelje të paragrafit 2 të nenit 31 të Kushtetutës, në lidhje me paragrafin 1 të nenit 6 të Konventës Evropiane për të Drejtat e Njeriut. Aktgjykimi AC-I-23-0567, i 19 qershorit 2025, u shpall i pavlefshëm dhe çështja u kthye në Kolegjin e Apelit të Dhomës së Posaçme për rishqyrtim.

Kolegji tani duhet ta shqyrtojë sërish rastin, këtë herë duke iu përmbajtur standardit që Kushtetuesja ia vuri: një vendim për paga të nëntë viteve nuk mund të merret pa u dëgjuar pala.