"Ndek, pshtum": dëshmia nga kafeneja "From" për të shtënat mes "Capave" dhe Sekiraqëve

Pesë minuta pasi u ul në kafenenë "From" në Prishtinë, një makinë ndaloi në anën tjetër të rrugës. Dy minuta më vonë, sipas dëshmisë së Nderim Halimit, dy persona të maskuar me armë të gjata "AK-47" kaluan rrugën drejt lokalit dhe, sapo u afruan, filluan të shtënat.

Halimi, dëshmitar i propozuar nga Prokuroria, e tregoi këtë version të mbrëmjes kritike para trupit gjykues të Gjykatës së Prishtinës, ku ka vazhduar gjykimi për incidentin e shtatorit 2024, kur u shkrepën armët mes pjesëtarëve të familjes Gashi, të njohur me nofkën "Capat", dhe familjes Sekiraqa.

Në këtë rast janë të akuzuar tetë persona: Korab Gashi, Valdrin Ademi, Robert Llumnica, Sali Sekiraqa, Fatos Abazi, Endrit Llapashtica, Dardan Marevci dhe Erd Marevci. Ndaj tyre Prokuroria ka ngritur akuza për vrasje të rëndë, vrasje të rëndë në tentativë dhe armëmbajtje pa leje. Askush nga të akuzuarit nuk është shpallur fajtor, pasi procesi gjyqësor është në vijim.

Halimi tha se atë ditë ka qenë dy herë në lokalin "From". Në mbrëmje, sipas tij, e kishte thirrur në telefon Vesel Bunjaku dhe u takuan fillimisht te Xhamia e Vogël në Breg të Diellit, e më pas vazhduan drejt lokalit "From", kafenesë së Sali Sekiraqës. Në lokal, tregoi dëshmitari, ndodheshin edhe Sekiraqa me djalin e tij dhe shokë.

Pasi personat e maskuar, sipas fjalëve të tij, "e kanë kryer misionin e tyre", Halimi thotë se pa edhe dy apo tre persona të tjerë duke ikur nga vendi i ngjarjes. Ai dëshmoi se pas ngjarjes thirri Policinë tri herë dhe Ndihmën e Shpejtë katër herë.

Kur ka dalë jashtë lokalit, tha Halimi, e ka gjetur të akuzuarin Robert Llumnica të shtrirë në tokë, të plagosur dhe duke kërkuar ndihmë. Kur kuptoi se Llumnica ishte i lënduar në bark, dëshmitari tha se nuk guxoi t'i ofrojë ndihmë, por e njoftoi se Ndihma e Shpejtë ishte rrugës. Më pas u kthye brenda dhe i afrua Sali Sekiraqës, të cilin e pa të shtrirë dhe të plagosur. "’Ndek’, pshtum", tha Halimi se i kishte thënë Sekiraqa në ato momente. "Ndek" është nofka e dëshmitarit.

Në pyetjet e palëve, avokati Kadri Mjekiqi, mbrojtës i palës së dëmtuar, e pyeti Halimin si kishte qenë i maskuar tani i ndjeri Premtim Gashi. "Me një jaknë të zezë, me një kapelë të lëshuar deri te sytë, por fytyrën nuk ia kam pa", u përgjigj dëshmitari.

Avokati Kujtim Kërveshi, mbrojtës i të pandehurit Korab Gashi, kërkoi të dinte si arriti Halimi në konstatimin se Sekiraqa ishte cak i sulmit. Dëshmitari u përgjigj se, pasi Sekiraqa kishte mbetur i plagosur, sipas tij ishte normale që ai të ishte caku. I pyetur për raportet me Vesel Bunjakun, Halimi tha se e ka njohur babain e Bunjakut dhe se me të i kishte rastisur të takohej në Qendrën e Paraburgimit në Gjilan. Kërveshi tentoi të parashtrojë edhe pyetje të tjera lidhur me Bunjakun, por u kundërshtua nga mbrojtja e të pandehurit Llumnica.