Muri i parrënuar në Gjilan: Apeli rrëzon akuzën për shefin, jo për drejtoreshën

Drejtoresha e Inspeksionit në Komunën e Gjilanit, E.H., mbetet nën akuzë për keqpërdorim të pozitës apo autoritetit zyrtar, pasi Gjykata e Apelit ka vërtetuar aktakuzën ndaj saj. Me të njëjtin vendim, shefi i Inspeksionit, S.K., është liruar nga akuza.

Në qendër të çështjes është një mur në lagjen "Fidanishtja". Rasti nisi me ankesat e një afaristi, V.S., pronar i disa lokaleve në këtë lagje, i cili pretendonte se muri i ngritur para lokaleve të tij ia kishte bërë të pamundur shfrytëzimin e tyre.

Sipas avokates së tij, Drejtoria e Inspeksionit kishte vendosur më 1 korrik 2024 që muri të rrënohej, pasi ishte konstatuar se ndërtimi binte ndesh me situacionin e lejeve ndërtimore. Vendimi, megjithatë, nuk u ekzekutua kurrë.

Pas kësaj, në Prokurorinë Themelore në Gjilan u paraqit kallëzim penal dhe ndaj dy zyrtarëve u ngrit aktakuzë për keqpërdorim të pozitës apo autoritetit zyrtar. Pas vendimit të Apelit, akuza mbetet vetëm ndaj drejtoreshës.

Vërtetimi i aktakuzës nuk do të thotë se E.H. është shpallur fajtore. Ajo prezumohet e pafajshme deri në një vendim të formës së prerë të gjykatës.