IQP ndal punimet në kantiere në gjashtë komuna: punëtorët pa masa sigurie

Disa kantiere ndërtimi në Prishtinë, Lipjan, Fushë Kosovë, Gjilan, Skenderaj dhe Ferizaj kanë mbetur pa punë pasi Inspektorati Qendror i Punës (IQP) ka urdhëruar ndërprerjen e menjëhershme të punimeve.

Masa është marrë gjatë inspektimeve në terren, ku inspektorët kanë konstatuar parregullsi në aspektin e sigurisë dhe shëndetit në punë. Emrat e objekteve dhe të kompanive që i ndërtojnë nuk janë bërë publike.

Ndalimi nuk është i përhershëm, por i kushtëzuar. "Si rezultat i këtyre konstatimeve, Inspektorati Qendror i Punës ka marrë vendime për ndalimin e punimeve deri në eliminimin e parregullsive dhe përmbushjen e kërkesave ligjore për sigurinë dhe shëndetin në punë. Inspektorati Qendror i Punës u bën thirrje të gjithë punëdhënësve që të zbatojnë me përpikëri masat e sigurisë dhe shëndetit në punë, me qëllim të parandalimit të aksidenteve dhe mbrojtjes së jetës dhe shëndetit të punëtorëve", ka njoftuar IQP.

Me fjalë të tjera, kantieret do të mbeten të heshtura derisa pronarët e tyre të dëshmojnë para inspektorëve se kanë plotësuar kërkesat ligjore për mbrojtjen e punëtorëve.