"Flaka ka me iu dalë": Prishtina del në protestë pas vrasjes së Arlinda Zekajt

"Liri, barazi, solidaritet". Me këtë thirrje ka nisur protesta në sheshin "Zahir Pajaziti" në qendër të Prishtinës, ku një numër i madh qytetarësh janë mbledhur pas vrasjes së Arlinda Zekajt në Vitomiricë. Sllogani kryesor që mbizotëron në shesh është një paralajmërim i drejtpërdrejtë për institucionet: "Gjumi s’ka me iu marrë, flaka ka me iu dalë".

Protesta është organizuar nga Kolektivi për Mendim dhe Veprim Feminist dhe nuk pritet të mbetet në shesh. Protestuesit pritet të marshojnë drejt Ministrisë së Drejtësisë, Këshillit Prokurorial të Kosovës, Këshillit Gjyqësor të Kosovës, Policisë së Kosovës dhe, në fund, Qeverisë së Kosovës.

Kolektivi e ka shpallur protestën si fillimin e një vale më të gjatë. "Andaj, të mërkurën, të ejten, të premten e ditët në vijim, ne do të dalim rrugëve, e do të bllokojmë institucione sepse është momenti i fundit që ky shtet të japë llogari. Nisemi prej sheshit Zahiri, te Ministria e Drejtësisë, Këshilli Prokurorial i Kosovës, Këshilli Gjyqësor i Kosovës, Policia e deri te Qeveria", thuhet në thirrjen e organizatorëve, të cilët kanë kërkuar organizim dhe solidarizim në shkallë kombëtare. Në pankarta dhe thirrje dëgjohet edhe fjala "Gra revoltohuni".

Në qendër të zemërimit është pyetja se çfarë bënë institucionet para vrasjes. Raportohet se Zekaj kishte denoncuar në vazhdimësi, pothuajse në të gjitha institucionet përgjegjëse të sigurisë dhe hetuesisë, kërcënimet dhe presionin e vazhdueshëm nga ish-bashkëshorti i saj dhe familjarët e tij. Prandaj protestuesit kërkojnë që dikush të mbajë përgjegjësi për atë që e quajnë neglizhencë institucionale në këtë rast.

Arlinda Zekaj u varros dje. Kunati i saj, i dyshuar për vrasjen, është arrestuar më herët nga një njësi speciale e policisë. Ai konsiderohet i dyshuar derisa gjykata të vendosë ndryshe, ndërsa hetimet për rastin vazhdojnë.

Thirrjes për drejtësi për viktimat e dhunës në familje dhe për gratë e vrara po i bashkohen gjithnjë e më shumë qytetarë, duke e kthyer rastin e Vitomiricës në një çështje që po troket drejtpërdrejt në dyert e institucioneve kryesore të vendit.