Me pasaportë belge që nuk ishte e tij, iraniani ndalohet në Aeroportin e Prishtinës

Një shtetas iranian është ndaluar në Aeroportin ndërkombëtar "Adem Jashari" në Prishtinë pasi, gjatë kontrollit, paraqiti një pasaportë të lëshuar nga Belgjika që dyshohet se nuk i përkiste atij. Rasti është raportuar më 18 gusht 2026, rreth orës 18:00.

Sipas policisë, i dyshuari është intervistuar lidhur me dokumentin që kishte prezantuar. Gjatë intervistimit ai ka pranuar se pasaporta nuk ishte e tij dhe se është shtetas iranian, ndërsa nuk kishte me vete asnjë dokument tjetër.

Në raportin policor thuhet: "Aeroporti 'Adem Jashari' / 18.08.2026 – 18:00. Raportohet se një i dyshuar mashkull ka prezantuar në kontroll pasaportën e lëshuar nga shteti i Belgjikës, e cila dyshohej se nuk i përkiste personit që e ka prezantuar. I dyshuari gjatë intervistimit e ka pranuar se pasaporta nuk është e tij dhe ai është shtetas iranian dhe nuk posedon asnjë dokument me vete. I dyshuari gjatë intervistimit ka deklaruar se ndihet i rrezikuar në shtetin e tij dhe pas përfundimit të procedurave i njëjti është dërguar në zyrën e migracionit për vazhdimin e procedurës së azilit".

Pas përfundimit të procedurave, i dyshuari është dërguar në zyrën e migracionit, ku do të vazhdojë procedura e azilit.