Manxhuka, Azemi e dy të tjerë në Apel: mbrojtja thërret lirinë e shprehjes

Katër të dënuar në shkallë të parë, mes tyre zëdhënësi i Qeverisë së Kosovës, Arlind Manxhuka, dhe deputeti i Lëvizjes Vetëvendosje, Egzon Azemi, kërkuan më 21 tetor 2026 para Gjykatës së Apelit që të shpallen të pafajshëm. Gjykata Themelore i kishte dënuar në lidhje me akuzën për nxitje urrejtjeje ndaj gjyqtarit Mentor Bajraktari dhe ish-prokurorit Afrim Shefkiu. Dy të tjerët në këtë rast janë Qerim Elshani dhe Edi Zenelaj.

Rrënjët e çështjes shkojnë te rasti i Dejan Pantiqit, i dyshuar për sulm terrorist në zyrat e Komisionit Komunal Zgjedhor në Mitrovicë të Veriut. Bajraktari, si gjyqtar i procedurës paraprake, dhe Shefkiu, si prokuror, kishin ndërmarrë veprime për ndryshimin e masës së paraburgimit ndaj Pantiqit. Reagimet që pasuan atë vendim janë ato që përfunduan në sallën e gjyqit.

Avokati i Manxhukës, Taulant Hodaj, e ndërtoi mbrojtjen mbi një dallim: atë mes fjalës së ashpër dhe veprës penale. Sipas tij, klienti i tij ka shprehur mllef me gjuhë ngacmuese, por kjo nuk përbën krim. "Janë dy fjalë që i ka bo në kontest të asaj kohe, a hin në kuadër të lirisë së shprehjes? Gjykata e shkallës së parë se ka bo këtë dallim, besoj që kjo gjykatë duhet me bo këtë dallim", tha Hodaj.

Hodaj iu referua edhe Gjykatës Evropiane për të Drejtat e Njeriut, e cila, sipas tij, raste të ngjashme i ka trajtuar si kritikë ndaj vendimeve gjyqësore, të mbrojtur nga liria e shprehjes. Ai i kërkoi trupit gjykues që ta vlerësojë gjuhën thumbuese dhe të bëjë dallimin për përgjegjësinë penale, duke paralajmëruar për pasojat e një standardi të tillë: "Nëse vazhdohet me këtë standard, kritika pa kërkuar dhunë e pa nxitje, nëse vazhdon atëherë çka mund të thojmë ndaj një vendimi për dhomat e specializuara, 70% e popullsisë së Kosovës duhet me u gjyku".

Manxhuka, i pranishëm personalisht, e vendosi reagimin e tij në kontekstin e vitit 2022 dhe të situatës në veri. "Në kontestin e reagimit, e dim që në vitin 2022 ka pas një lloj rezistence të jashtëzakonshme për kundër shtrirjes së rendit juridik dhe kushtetues në veri të vendit, madje e kem pa që pikërisht reagimi që e kemi bo ka qenë ish-pjesëtar i policisë së Kosovës dhe në kohën kur u patën shpall zgjedhjet lokale në veri ka qenë i dyshuar për hedhje me bombë dhe i dënum, dhe në rrethana të lehtësimit të dënimit ndodhi edhe reagimi, reagimi nuk ka përmend asnjë lloj emri se nuk i është adresuar kurrkujt individualisht ka qenë një indinjatë e shprehur asaj kohe si qëndrim i lirë i një qytetari të një vendi", tha ai para gjykatës së shkallës së dytë.

Azemi nuk ishte në sallë. Avokatja e tij, Teutë Xhema, kërkoi lirimin e tij për mungesë provash dhe argumentoi se Themelorja nuk i kishte zbatuar rekomandimet e shkallës së dytë, edhe pse rasti ishte kthyer një herë në rigjykim.

Në të njëjtën linjë foli edhe Muharrem Kurtaj, mbrojtësi i Elshanit, i cili po ashtu mungonte. Sipas Kurtajt, Themelorja nuk arriti të përcaktojë se kujt i ishte drejtuar kanosja, siç kishte kërkuar Apeli. Ai tha se Elshani kishte komentuar në një postim një thënie të Avni Rrustemit, pa iu drejtuar asnjë personi dhe asnjë pozite.