Grusht, pastaj plumba në një lokal në Lipjan: vazhdon gjykimi për vrasjen e 22-vjeçarit

Një mosmarrëveshje, një grusht në fytyrë dhe më pas të shtëna me pistoletë brenda një lokali në Lipjan. Kështu e rindërton prokuroria natën e 5 gushtit 2022, kur një 22-vjeçar mbeti i vrarë dhe dy persona të tjerë u plagosën.

Për këtë rast, në Gjykatën Themelore në Prishtinë po vazhdon gjykimi ndaj G.S., i cili akuzohet për vrasje të rëndë në bashkëkryerje.

Aktakuza u ngrit më 14 nëntor 2024. Sipas saj, konflikti shpërtheu pas një mosmarrëveshjeje mes të akuzuarve, nga njëra anë, dhe viktimës D.G. e të dëmtuarit J.G., nga ana tjetër. Prokuroria pretendon se G.S. e goditi i pari 22-vjeçarin me grusht në fytyrë, ndërsa pak më pas një tjetër i akuzuar, M.G., nxori pistoletën dhe shtiu në drejtim të tyre.

Plumbi e goditi të riun në gjoks dhe ai humbi jetën. J.G. mori plagë të rënda në bark, ndërsa një person tjetër, A.B., u plagos lehtë në këmbë nga një predhë e armës së zjarrit.

Të gjitha këto mbeten pretendime të prokurorisë, të cilat do të shqyrtohen në sallën e gjyqit. I akuzuari konsiderohet i pafajshëm derisa gjykata të vendosë me aktgjykim të formës së prerë.