Kurti: Buxheti i 2027-s kalon për herë të parë 1 miliard euro për investime kapitale

Investimet kapitale në Kosovë do ta kalojnë për herë të parë pragun e një miliard eurove në buxhetin e vitit 2027, sipas kryeministrit të Kosovës, Albin Kurti. Projektligji pritet të miratohet të hënën, në mbledhjen e radhës të Qeverisë.

Kurti e paralajmëroi këtë gjatë fjalimit në mbledhjen e Këshillit të Përgjithshëm të Lëvizjes Vetëvendosje. "Ky është buxhet i rrugëve, hekurudhave dhe i digave. Për herë të parë buxheti për investime kapitale do të tejkalojë vlerën 1 miliard euro", deklaroi ai. Sipas kryeministrit, buxheti i vitit të ardhshëm do të jetë i orientuar drejt projekteve kapitale, përshpejtimit të rritjes ekonomike dhe përmirësimit të cilësisë së vendeve të punës.

Një zë i veçantë janë komunat. Kurti tha se buxheti për to do të arrijë gjithsej 908 milionë euro, çka ai e cilësoi si rritje prej dy të tretash krahasuar me buxhetin që, sipas tij, e kishte trashëguar Qeveria. Rritjen ai ia atribuoi mbështetjes së vazhdueshme përmes granteve qeveritare.

Pjesa tjetër e fjalimit iu kushtua parave që vijnë nga Bashkimi Evropian dhe mekanizmat financiarë ndërkombëtarë. Sipas Kurtit, për periudhën 2026-2027 Kosova pritet të përfitojë 180,5 milionë euro nga fondet e paraanëtarësimit IPA. Këtë vit, tha ai, janë siguruar edhe 119 milionë euro grante nga Korniza Investuese për Ballkanin Perëndimor, prej të cilave 90 milionë euro janë paraparë për impiantin e ujërave të zeza në Prishtinë dhe 23,8 milionë euro për impiantin në Podujevë.

Kryeministri përmendi gjithashtu 61,8 milionë euro parafinancim nga Plani i Rritjes, si dhe kërkesën për lirimin e 153 milionë eurove për reformat e zbatuara deri në qershor. Ai tha se Qeveria po i përshpejton hapat për ta përmbushur afatin e dhjetorit, pas vonesave që, sipas tij, janë shkaktuar nga bllokada politike.

Në planin e kostove për qytetarët, Kurti theksoi se miratimi i ligjit për SEPA-n, më 15 tetor, pritet t'u sjellë qytetarëve dhe bizneseve kursime prej rreth 55 milionë eurosh në vit nga transferet bankare. Ai shtoi se Kosova po negocion edhe për t'u bashkuar me zonën e roaming-ut të BE-së përmes skemës "Roam Like at Home" (roaming si në shtëpi), e cila synon uljen e kostove të telefonisë gjatë udhëtimeve në vendet e Bashkimit Evropian.